ЭМС-ын сайд асан Г.Шийлэгдамбын биеийн байдал тааруу байгаа талаар эх сурвалж мэдээллээ. Хэдийгээр түүний биеийн байдал тааруу байгаа ч батлан даалтад гаргахыг шүүхээс зөвшөөрөөгүй юм. Тодруулбал,  АТГ-аас түүнийг яллагдагчаар татах хүсэлтээ прокурорын байгууллагах хүргүүлсэн. Прокурор хүсэлтийг нь шүүхэд хүргүүлсэнээр шүүх өнгөрсөн пүрэв гарагт түүнийг яллагдагчаар татаж, цагдан хорих хугацааг 2 сараар сунгасан юм.
 
Энэ үеэр Г.Шийлэгдамбын өмгөөлөгч түүний биеийн байдал тааруу байгаа хэмээн батлан даалтад гаргах хүсэлтийг хүргүүлсэн ч шүүх хүлээн аваагүй билээ.  Түүнийг Эрүүгийн хуулийн тусгай ангийн 268-д зааснаар эрүүгийн хэрэг үүсгэн шалгаж байна.
 
Г.Шийлэгдамба нь өдгөө Төв аймгийн Урьдчилан хорих төвд саатуулагдаж байгаа юм.
 
Г.Шийлэгдамбын ажлын өрөөнөөс ихээхэн хэмжээний мөнгө олсон. Энэ нь авлигын мөнгө байсан учраас саатуулсан гэдэг. Харин Г.Шийлэгдамба хорих ангиас Ерөнхий сайд Ч.Сайханбилэгт илгээсэн захидалдаа уг мөнгө нь найзынх нь мөнгө байсан, тэр мөнгийг түр хадгалж байсан тухай бичсэн байдаг билээ. Мөн захидалдаа үүрэгт ажлаасаа чөлөөлөгдөх хүсэлт дурьдсанаар түүнийг ЭМС-ын сайдын суудлаас чөлөөлж, түүний оронд түр үүрэг гүйцэтгэгчээр Шадар сайд Ц.Оюунбаатарыг томилоод байгаа билээ.