Нийслэлийн нутаг дэвсгэрт гэр орноосоо дайжин, хараа хяналтгүй байгаа хүүхдийг илрүүлэх, гэр бүлд нь хүлээлгэн өгөх, боломжгүй тохиолдолд хүүхдийн асрамж, халамжийн байгууллагын харьяалалд шилжүүлэх нэгдсэн арга хэмжээг энэ сарын 25-27 өдрүүдэд зохион байгуулах болжээ.

Хүйтний улирал болж байгаатай холбогдуулан Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Хараа хяналтгүй хүүхдийн талаар авч хэрэгжүүлэх арга хэмжээний тухай” А/894 дүгээр захирамж гаргасан байна. Уг захирамжийгн дагуу дээрх нэгдсэн арга хэмжээг зохион байгуулах болжээ.

Хараа хяналтгүй явж буй хүүхдийг илрүүлэх, бүртгэх, харьяалалтай болгох арга хэмжээг дүүрэг бүрт зохион байгуулах ажлын хэсэг байгуулж, шаардлагатай төсвийг шийдвэрлэхийг дүүргийн Засаг дарга нарт, гэр бүлд нь хүлээлгэн өгөх, халамж, асрамжийн төвүүдийн хамгаалалд шилжүүлэхтэй холбоотой ажлыг зохион байгуулж ажиллахыг Хүүхэд, гэр бүл хөгжлийн газарт үүрэг болгосон байна.

Мөн уг ажилд шаардагдах 5 сая 748 мянган төгрөгийг санхүүжүүлтийг шийдвэрлэхийг НЗДТГ-т даалгажээ.