Өнгөрсөн сарын 20-ны байдлаар нийт нутгийн 80 гаруй хувь нь цасан бүрхүүлтэй, цасны зузаан 7-12 см байна. Увсын Улаан­гом, Хөвсгөлийн Цагаан-Үүр, Завханы Яруу, Баян­хайрхан, Булганы Ра­шаант, Баянхонгорын Жар­галант, Төвийн Жаргалант сумдад 13-22 см байгаа аж. Нийт нутгийн 40 орчим хувьд нь өвөлжилт хүндрэх эрсдэл ихтэй. Увс аймаг бүхэлдээ, Булганы ихэнх, Архангайн хойд, Төв аймгийн баруун хагас, Дархан-Уул, Сэлэнгийн өмнөд хэсэг хамгийн их эрсдэлтэй, Завхан, Хөвс­гөл, Хэнтий, Сүхбаатар, Дорно­го­вийн зарим нутгаар мөн эрсдэл ихтэй байна гэж Цаг уур, орчны шинжилгээний газраас сэрэмжлүүлж байна. Арванхоёрдугаар сарын цаг агаарын урьдчилсан мэдээгээр эрсдэл ихтэй байгаа нутгийн хойд хагаст олон жилийн дунджаас хүйтэн байх ба цас ихэнх нутагт дунджийн орчим, зарим газраар ахиу орохоор байгаа нь нөхцөл байдлыг улам хүндрүүлж, өвөлжилтөд таагүй нөлөөлөхөөр байна.
Отроор өвөлжих өрхийн тоо 2,2 мянга, малын тоо 1,5 сая толгойгоор нэмэгдэж байгаа­тай холбогдуулан отроор яваа малчдад эрүүл мэндийн тус­ламж үйлчилгээний хүр­тээм­жийг нэмэгдүүлэх арга хэмжээ авах, авто замын засвар, арчлалтын компаниудын гүйцэт­гэсэн ажлын санхүү­жилтийн үлдэгдлийг яаралтай шийдвэрлэхийг холбогдох албан тушаалтанд үүрэг болгожээ.
Өвөлжилт, хаваржилтын байдал хүндрэх эрсдэлтэй байгааг тооцон гамшгаас хам­гаалах төлөвлөгөөнд тодотгол хийж, бэлэн байдлыг хангах зэрэг арга хэмжээ авахыг холбогдох яам, агентлаг болон аймгийн Засаг дарга нарт үүрэг болгосон байна.