Нийслэл хотын албан татварын тухай хууль хэрэгжиж эхлээд хоёр сар гаруй болж байна. Энэ хугацаанд нийслэл хотын албан татварын төрлөөр 193 сая 177.0 мянган төгрөгийг нийслэлийн төсөвт төвлөрүүлжээ.

Нийслэл хотын албан татварын тухай хуульд нийслэлийн нутаг дэвсгэрт үйлчилгээ үзүүлж буй баар, ресторан, зочид буудал, амралтын газар гэсэн дөрвөн төрлийн тусгай үйлчилгээ, бүх төрлийн архи тамхины жижиглэн худалдаанд нийслэл хотын албан татварыг нэг хувиар ногдуулахаар заасан бөгөөд энэхүү  татвараас жилдээ 13 тэрбум гаруй төгрөгийг нийслэлийн төсөвт төвлөрүүлэх тооцоо гарчээ.
Нийслэлийн хэмжээнд 5374 суутгагч 4578 тусгай зөвшөөрлийн дагуу үйл ажиллагаа явуулж буй бөгөөд одоогийн байдлаар татвар төлөгчийн бүртгэлийн программд 543 иргэн, 3834 хуулийн этгээд, нийт 4377 албан татвар суутгагчийг бүртгэжээ.