“Номин” их дэлгүүрт Чингис хааны товгор дүр бүхий үнсний сав худалдаалж байгаа талаар иргэдийн мэдээллийн дагуу ШӨХТГ-ын дэд дарга А.Ариунболд болон тус газрын улсын байцаагч нар хамтран шалгаж танилцаад худалдан борлуулахыг хориглосон байна.

Үндэсний бахархалт хүний дүр бүхий тамхины үнсний савны зориулалттай бүтээгдэхүүн худалдаалж байгаа нь Зар сурталчилгааны тухай хуулийн 7 дугаар зүйлийн 7.4.2-д “Монгол улсын болон бусад улсын төрийн бэлгэ тэмдэг, түүхэн алдарт хүн, үндэсний мөнгөн тэмдэгт, шашин шүтлэгийг гутаан доромжилсон”, 7.4.6-д “хүнлэг ёс суртахуун, Монгол хүний эрхэмлэн дээдэлдэг зан заншлын ёс горимыг зөрчсөн” гэж үзсэн байна.

 “Номин” их дэлгүүр ШӨХТГ-ын албан шаардлагыг хүлээн авч, уг бүтээгдэхүүнийг худалдаанаас татан аваад байгаа юм байна.