АСЕМ-ийн төлөөлөгчдийг хүлээн авах 44 зочид буудлын үйлчилгээний ажилтныг бэлтгэх, мэргэшүүлэх сургалтад хамрах хүсэлтэй иргэдийг сонгон шалгаруулах ажиллагаа Корпорейт зочид буудалд хоёр дахь өдрөө үргэлжилж байна.

44 зочид буудалд нийт 3200 үйлчилгээний ажилтан шаардлагатай бөгөөд одоогоор 1800 ажилтан бэлэн болжээ. Мэргэшүүлэх сургалтад хамрахаар 1520 иргэн бүртгүүлжээ. Зочид буудлууд бүртгүүлсэн иргэдээс ачаа зөөгч, бармен, зочин хүлээн авагч, гадна талбайн үйлчлэгч зэрэг 11 мэргэжлээр ажиллах 800 хүнийг сонгож, байнгын ажлын байраар хангах бол үлдсэн 600 иргэн нь АСЕМ-ийн уулзалтын үеэр хөтөч, орчуулагч хийх аж. Дээрх 600 иргэнийг АСЕМ-ын хурал эхлэхийн өмнө бүртгэнэ гэдгийг Хөдөлмөрийн яамны харъяа Хөдөлмөр эрхлэлтийн үйлчилгээ, мэдээлэл, судалгааны үндэсний төвийн захирал захирал С.Чойноров хэллээ.