ОХУ-ын археологичид Баян-Өлгий, Ховд, Увс аймгийн хойд хэсгээр байрлах хадны сүг зургуудыг  14 мянган жилийн настай болохыг тогтоожээ. Оросын шинжлэх ухааны академийн Сибирь судлалын Новосибирскийн Археологи, Угсаатны зүйн хүрээлэнгийн эрдэмтэд одоогоос арваад жилийн өмнө эдгээр аймгуудад судалгаа хийсэн удаатай. Орчин үеийн технологийн тусламжтайгаар сүг зургуудын насжилт, хамаарах үеийг ийн тогтоосон байна. Эртний сүг зургийг судлах  хоёр дахь шатны ажил энэ оны долоодугаар сард эхэлж, манай эрдэмтэд ОХУ, Францын эрдэмтэдтэй хамтрах юм.
Энэ талаар ОХУ-ын ШУА-ийн Сибирь судлалын НАУЗХ-ийн орлогч захирал Вячеслав Молодин “Монгол орны баруун аймгуудын зүүн хойд хэсэгт байрлах хадны сүг зургууд таамаглаж байснаас хамаагүй эртнийх гэдэг нь тогтоогдлоо. Энэ нь дөрөвдэх галавын үе буюу Плейстоцений сүүл буюу 12-14 мянган жилийн өмнөх үед хамаарна. Эдгээр зургууд нь адуу, арслан, арслан заантай төстэй дүрстэй” хэмээн ярьжээ.