Монголд циркийн урлаг хөгжөөд 70 жилийг ардаа орхижээ. Энэ урт хугацааны түүхийг өнөөдөр ч циркчид маань нэр төртэйгөөр үргэлжлүүлэн авч яваа. Өнгөрсөн жил циркчдийн хувьд олз омог ихтэй, амжилт бүтээл арвин байсан. Тэгвэл энэ жил амжилтаа ахиулж, хамгийн эхний олон улсын чанартай тэмцээндээ оролцохоор Францын Парис хотод бэлтгэлээ базааж эхэлжээ. Хэдхэн хоногийн дараа тус хотод болох тэмцээн энэ жил 24 дэх удаагаа зохион багуулагдаж байгаа бөгөөд аль хэдийнэ дэлхийн шилдэг циркийн жүжигчдийн оролцох дуртай тэмцээн болж чаджээ. Монгол Улсаас өнгөрсөн жилийн шилдэг акробат үсрэлтийн төрөлд шилдгээр шалгарсан Ц.Пүрэвжаргал ахлагчтай жүжигчид оролцохоор ийнхүү бэлтгэлээ базааж буй аж. Түүнчлэн “Монгол циркийн хөгжлийн төв” ТББ-ын тэргүүн Н.Эрдэнэ тус тэмцээний шүүгчээр ажиллахаар болсон байна. Харин циркчдийн маань дараагийн зогсоол нь ирэх сард Испани улсад болох олон улсын циркчдийн тав дахь удаагийн тэмцээн байх нь. Тус тэмцээнд Монголын циркчид “десант” буулгахаар бэлтгэл ажилдаа орсон гэнэ. Тодруулбал, Н.Энхболд багштай Т.Номуунбаатар ахлагчтай шидэх банзнаас үсрэгчид, Дудартай акробат номероор, Ц.Сэлэнгэ багштай уран нугаралтын жүжигчид хунгийн бүжиг номероор гээд нийт гурван үзүүлбэрээр 16 жүжигчин Монгол Улсаа төлөөлөн оролцох юм байна.