Боловсролын магадлан итгэмжлэх үндэсний зөвлөл (БМИҮЗ)-өөс өнөөдөр “Дээд боловсролын сургалтын байгууллагын болон хөтөлбөрийн магадлан итгэмжлэлийн шинэ шалгуур”-ыг их, дээд сургууль, коллежийн удирдлагуудад танилцууллаа.

Шинэ журмаар их, дээд сургууль, коллеж, МСҮТ-ийг 5 жилийн хугацаатай магадлан итгэмжлэхээр болжээ. Хуулийн найруулгын өөрчлөлтөөр эрхзүйн шинэчлэлийн хүрээнд дээд боловсролын сургалтын байгууллагууд заавал магадлан итгэмжлэгдэнэ.

БМИҮЗ-ийн дэд дарга Х.Батсайхан хэлэхдээ, "Монгол Улсад одоогоор 100 гаруй их дээд сургууль, коллеж байгаагаас 71 нь магадлан итгэмжлэгдсэн. Энэ оны нэгдүгээр сарын байдлаар 16 сургуулийн магадлан итгэмжлэлийн хугацаа нь дуусч байгаа. Эдгээр сургуулиуд ҮЗ-тэй холбогдож, хугацаагаа сунгах боломжтой. Өмнөх хуулиндаа сургуулиуд сайн дураараа магадлан итгэмжлэгддэг байсан. Харин УИХ-д барьсан хуулийн найруулгын өөрчлөлтөөр дээд боловсролын байгууллага заавал магадлан итгэмжлэгдэх ёстой гэж өөрчилсөн. Харин сургалтын хөтөлбөрөө сайн дураар итгэмжлүүлэх боломжтой. Мөн аливаа асуудал шийдүүлэхдээ БМИҮЗ-өөс зөвшөөрөл авсны дараа яаманд хандах гэсэн шат дараалалтай болгосон. Өмнө нь сургуулиудыг 10 жилийн хугацаатай магадлан итгэмжилдэг байсан. Гэвч энэ хугацаанд гурван удаа тайлан гаргасан сургууль бий. Дээд боловсролынхон тасралтгүй өсөн дэвжих ёстой байгууллага учраас шинэ хуулиндаа итгэмжлэх хугацааг багасгасан. Үндсэндээ сургууль бүрийг байнга хянах боломжтойгоос гадна хэрэгтэй зөвлөгөө өгдөг системийг бий болгож байна гэсэн үг. Хэрвээ магадлан итгэмжлэгдсэн сургуулиуд дотор чанар муу байвал нэг жилийн хугацаа өгч, манай зүгээс шаардлагатай зөвлөгөө өгөх болно" гэв.

Энэ үеэр БМИҮЗ-ийн дэд болон үндсэн гишүүддээ гишүүнчлэлийн батламжийг гардуулсан юм.