Нийслэлийн хүн ам олшрохын хэрээр алслагдсан хороонуудад суурьшлын бүс бий болж буй. Алслагдсан дүүргийн иргэдэд нийтийн тээврийн том оврын автобус тэр бүр хүрч үйлчлэхгүй байгаа нь нууц биш. Хэзээнээс эхэлж шинээр баригдсан хорооллын оршин суугчдад  нийтийн тээврийн хэрэгслээр үйлчлэх талаар  нийслэлийн Тээврийн газрын Олон нийттэй харилцах мэргэжилтэн Д.Болдоос тодрууллаа.

- “Буянт-Ухаа 2” хорооллын байрууд эхнээсээ ашиглалтад орж, оршин суугчид нь орж эхэллээ. Хэзээнээс эхэлж нийтийн тээврийн хэрэгслэл үйлчилж эхлэх вэ?

-Ганц “Буянт-Ухаа 2” хорооллоор тогтохгүй алслагдсан орон сууцны олон хороолол бий. Саяхан “Ривер Гарден” хороолол руу автобусны шинэ чиглэл нээлээ.  “Буянт-Ухаа 2” хороолол руу автобусны чиглэл нээх судалгааны ажлыг хийж байна. Автобусны шинэ чиглэл нээх саналаа  Тээврийн газар холбогдох эрх бүхий газарт хүргүүлнэ. Машин цаг тарифын үнэлгээний хөрөнгө төсөв нь нийслэлийн төсөвт суугдаж байж автобусны шинэ чиглэлийг батална.
 
-Өнөөдрийн байдлаар, нийслэл хотын хэдэн чиглэлд хэчнээн тооны том оврын автобус үйлчилж байна вэ?

-Улаанбаатар хотын 76 чиглэлд, төрийн болон хувийн хэвшлийн 900 гаруй том оврын автобус иргэдэд үйлчилж байна.  Тогтоосон хуваарийн дагуу ажлын өдрүүдэд 06:45-22:30, амралтын өдөр 08:00-21:00 хүртэл нийтийн тээврийн хэрэгслээр зорчигчдод үйлчилдэг.

-Нийтийн тээврийн бизнес эрхлэгчид саяхан л бензин шатахуун байхгүй, ажил хаяна гэж байсан. Нийтийн тээврийн үйлчилгээ хэвийн явагдаж байна уу?

-Одоогоор нийтийн тээврийн үйлчилгээ хэвийн явагдаж байна. Харин иргэдийн зүгээс “Автобус цагаараа явахгүй. Оройн цагаар хугацаандаа ирэхгүй хүлээлгэж байна” гэсэн гомдол ирүүлж байгаа. Автобуснууд цагтаа ирэхгүй байгаа нь замын хөдөлгөөний түгжрэлтэй зайлшгүй холбоотой. Нийтийн тээврийн автобусыг цаг, маршрутын дагуу явуулъя гэвэл замын хөдөлгөөний ачааллын асуудлыг шийдвэрлэхээс өөр арга үгүй юм.