Нэн ховор амьтны нэг болох хандгай хууль бусаар агнасан хэрэг энэ сарын 19-20-ыг шилжих шөнө Асралт хайрханд гарчээ. Энэ талаар нэгэн иргэн “Ганзо Төмөрбаатар” нэрээр “фэйсбүүк” хуудсаар дамжуулан олон нийтэд мэдээлсэн юм . Тэрбээр “Асралт хайрхан явах замд энэ хэргийг үйлджээ. Сэтгэл их өвдөж байна. Хулгайн анчин хандгайны мах, уруул, эврийг нь аваад зугтжээ. Холбогдох хүмүүс нь шалгаасай” хэмээн бичээд агнуулсан хандгайн зурагтай хамт нийтэлжээ. Энэ талаар ЦЕГ-ын хэвлэл мэдээллийн төвийн ахлах мэргэжилтэн, цагдаагийн ахмад Ё.Лхагвасүрэнгээс тодруулахад “Тодорхой мэдээлэл алга” гэлээ. Харин уг хэргийн талаар судалж буй Байгаль орчин ногоон хөгжил, аялал жуулчлалын яамны ахлах мэргэжилтэн А.Баясгалангаас мэдээлэл авах гэсэн боловч утасны дуудлагаа хүлээж авсангүй. Түүнээс өөр тоймтой мэдээлэл өгчих хүн яамныхан дотор байсангүй.