Замын хөдөлгөөний  дүрэм зөрчихөд оноо хасдаг журам хэрэгжиж эхэлснээс хойш сар гаруйн хугацаанд нийт 10191 жолооч 1-5 хүртэлх оноогоо хасуулсан гэж ЗЦГ мэдээллээ.
Оноо хасуулсан жолооч нарын 50 хувь нь 2-5 хүртэлх  оноо хасуулсан гэнэ. Жолооч нар хамгаалах бүс зүүгээгүй, зорчигчдоо  хамгаалах бүс зүүлгээгүй,  гэрлэн дохио болон цагдаагийн хориглосон дохиог, орон нутгийн замд явахдаа хүн, ачаа тээвэрлэх журам зөрчсөнөөс болж  оноогоо хасуулж, торгуулсан байна.
Жолооч нар  www.service.police.gov.mn сайтад хандаж өөрийн зөрчлийн оноо, торгуулийн талаарх мэдээллээ авч болох юм байна. Цаашдаа оноо нь хэд хүрсэн, хаана ямар дүрэм зөрчиж оноогоо хасуулсан зэрэг мэдээллээ жолооч нар гар утсандаа тусгай апплкейшн татаж, шалгах боломжтой болох гэнэ.

-Зөрчлийн бүртгэлийн оноо хасагдсанаас хойш нэг жилийн хугацаанд дахин замын хөдөлгөөний аюулгүй байдлын тухай хууль тогтоомж зөрчөөгүй жолоочийн хамгийн сүүлд хасагдсан оноог сэргээж, мөн зөрчил гаргалгүй 2 жил болбол өнгөрсөн зөрчлийн 10 оноог сэргээж урамшуулах аж.
-Эрх бүхий албан тушаалтан, захиргааны хэргийн шүүхээс торгуулийг хүчингүй болгосон тохиолдолд бичгээр ирүүлсэн шийдвэрийг үндэслэн тухайн хасагдсан жолоочийн зөрчлийн оноог сэргээнэ.
-Зөрчлийн бүртгэлийн оноог хасуулсан жолооч хүсэлт гаргаж, зохих журмын дагуу сургалтад хамрагдаж, шалгалтад тэнцсэн тохиолдолд зөрчлийн бүртгэлийн 10 оноог сэргээн олгож байх юм байна.