Монгол Улсын гавьяат жүжигчин, ДБЭТ-ын гоцлол дуучин Э.Амартүвшин Олон улсын дуурийн дуулаач, мэргэжлийн хөгжимчдийн дунд зохион байгуулагддаг “Сөүлийн их наадам”-аас гуравдугаар байрын шагнал хүртжээ. 20 жилийн түүхтэй тус наадамд нэг жил нь төгөлдөр хуурч, дараа жил нь хийлч, дуулаач гэх дарааллаар жил бүр өөр өөр мэргэжлийн уран бүтээлчид өрсөлддөг бөгөөд дуулаачийн уралдаан нь гурван жилд нэг удаа болдог аж.
Тэрээр 11 орны 128 дуучинтай өрсөлдсөн төдийгүй шүүгч, концертмейстерүүд манай дуучны хоолойн цар хүрээ, авьяас билгийг үнэлж “Гран при хүртэх байсан” хэмээжээ. Э.Амартүвшин П.И.Чайковскийн нэрэмжит олон улсын дуурийн дуулаачдын уралдааны дэд байр, Английн BBC телевизээс зохион байгуулдаг “Cardiff singer of the world” наадмын үзэгчдийн таашаалд нийцсэн шагналуудыг тус тус хүртэж элэг нэгтнүүдээ баярлуулж байсан билээ.