УИХ-ын дарга З.Энхболдын зөвлөх А.Гансүхийн фэйсбүүк хуудсандаа нийтэлсэн "Миний байгуулсан гэрээ" гарчигтай тайлбарыг хүргэж байна.


Зарим улс төрч, эдийн засагч, судлаачдын бичиж байгаа судалгаа, тайлбар, нийтлэлийг харахад тэдэнд мэдээлэл дутуу байна. Иймээс товч тайлбар хийлээ.

Хэлэлцээрийн үр дүнд ОХУ-тай 2011 онд Дамжин өнгөрөх Транзит тээврийн гэрээний төслийг тохиролцож, Зам, тээврийн дэд сайд нарын төвшинд гарын үсэг зурсан. (Хоёр улсын Тээврийн дэд сайд нар нь тус бүрийнхээ Худалдаа, эдийн засгийн хамтын ажиллагааны Засгийн газар хоорондын комиссын дэргэдэх Зам, тээврийн дэд комиссын дарга нар байдаг болно) бол 2014 оны 8 дугаар сард БНХАУ-ын дарга Си Жинпины төрийн айлчлалын үеэр БНХАУ-тай Транзит тээврийн хэлэлцээрийг бусад Хэлэлцээртэй уялдуулан цогц хэлбэрээр Монгол улсад ашигтай нөхцлөөр байгуулсан. Тухайлбал, Монгол улс зөвхөн Тянжин боомтыг ашиглаж байсан бол нэмж Бохайн тэнгисийн 6 далайн боомтыг ашиглах, эдгээр далайн боомтоор дамжуулан Гуравдагч оронд бүтээгдэхүүнээ экспортлох квот, төмөр замын тээврийн хөнгөлөлттэй тариф зэрэг бусад нөхцлүүдийг тохирсон болно.

Мөн 2014 оны 8 сард Халхын голын тулалдааны ойг тэмдэглэхээр Монгол улсад хийсэн ОХУ-ын Ерөнхийлөгч Путины айлчлалын үеэр УБТЗ ХНН болон ОХУ-ын РЖД компанийн хооронд Стратегийн түншлэлийн гэрээ байгуулсан болно. Оросын талын үнэлснээр бол энэ гэрээгээр УБТЗ ХНН-ийн ирээдүйн 50 жилийн хөгжлийг тодорхойлсон гэж хэлж болно. Эдгээр Хэлэлцээрийг байгуулах нөхцлийг хангахад МУ-ын Ерөнхийлөгч Ц. Элбэгдорж, УИХ-ын дарга З. Энхболд, 2014 оны 7 дугаар сарын 1-ны өдрийн УИХ-ын нэгдсэн чуулганд оролцож саналаа өгсөн 53 гишүүн чухал үүрэг гүйцэтгэсэн. Ингэж хамтын хүчээр Монголчууд маш чухал, түүхэн Хэлэлцээрүүдийг байгуулж чадсан билээ.