ОХУ-ын Камчаткийн хязгаарын Усть-Камчатск хотын 16 настай сурагч охин  согтууран цагдаагийн ажилтныг хэрцгийгээр зодчихсон хэрэг гарчээ. Охинд “Төрийн төлөөлөгчийг эсэргүүцэн хүч хэрэглэсэн” хэргээр таван жил хүртэлх хугацаагаар хорих ялтай эрүүгийн хэрэг үүсгэсэн байна.

Согтуу охин орон сууцныхаа орцонд танхайрч шуугиан үүсгэснээс цагдаа дуудахад хүрчээ. Цагдаагийн ажилтан ирээд охиныг тайван байхыг анхааруулж, согтуурлын хэмжээг чинь тогтоохын тулд эмнэлэгт хүргэнэ шүү гэтэл охин энэ шаардлагыг хүлээн аваагүйгээр үл барам цагдаагийн ажилтныг зодож хэвлий, цавь руу нь өшиглөсөн  байна.

Ер нь ОХУ-д өсвөр насныхан насанд хүрэгчид, хууль сахиулагчдын шаардлагыг биелүүлэхгүй, тэдний өөдөөс хүч хэрэглэх явдал байн байн гарсаар байгаа юм. Энэ оны нэгдүгээр сард Москвагийн 15,16 настай хоёр охин 49 настай эрэгтэй рүү халдаж хэрцгийгээр зодон, цүнх, эд зүйлийг нь дээрэмдсэн хэрэг гарсан юм. Энэ хэргийн улмаас хохирогч эмнэлэгт бүр сэхээн амьдруулах тэсэгт хэвтэн эмчлүүлж байсан юм.