Улаанбурханы өвчлөл 21 аймагт бүртгэгдсэн билээ. Тиймээс өвчлөл өндөр байгаа аймгуудад ХӨСҮТ-ийн мэргэжлийн эмч нар очиж зөвлөгөө өгч сургалт хийгээд ирсэн байна. Өвчлөл өндөр байгаа аймгийн тоонд Дархан-Уул багтаж буй.
Тус аймагт энэ сарын 3-ны өдрийн байдлаар Дархан сумын таван Эрүүл мэндийн төв, Нэгдсэн эмнэлгийн үзлэгээр 1906 хүн улаанбурхан туссан болох нь тогтоогджээ. Нэгдсэн эмнэлгийн Халдвартын тасагт есөн хүүхэд хэвтэн эмчлүүлж байгаагаас эрчимт эмчилгээнд хоёр өвчтөн бий аж. Нас баралт нэгээр нэмэгдсэн бөгөөд аймгийн хэмжээнд бүртгэгдсэн улаанбурхан өвчний тохиолдлын судалгааг гаргахад 2059 өвчтөн гэж гарчээ. Улаанбурхан өвчний нийт тохиолдолд 16-24 насны залуучуудад хамгийн их буюу 37.7 хувь, 25-44 насны залуус 23.8 хувийг эзэлж байгаа аж. Тиймээс дээрх насанд тархалт хамгийн өндөр байгааг тогтоосон байна.
Мөн 0-11 сартай улаанбурхан өвчний бүрэн дархлаажуулалтад хамрагдаагүй хүүхдийн дунд тархалт элбэг бөгөөд нийт тохиолдлын 12.8хувийг нь эзэлж буй гэнэ.