Ховд аймгийн Мөнххайрхан сумын нутагт орших Үзүүр гялан гэдэг газраас түрүү сард олдсон хадны булшин дахь олдвор, эд өлгийн зүйлсийг Соёлын өвийг хамгаалах хуулийн дагуу БСШУЯ-ны шийдвэрээр Улаанбаатар хотод авчирч сэргээн засварлаж эхэллээ. Археологийн малтлага, судалгаагаар булшнаас 20 гаруй тооны олдвор, эд өлгийн зүйлс илэрсэн байна. Үүнд, эсгийгээр ороож оршуулсан хувцастай хүн, ногттой адуу, хонь, иж бүрэн эмээл, хазаар, дээл хувцас, модон болон төмөр аяга сав, арьс болон эсгий уутан богц бүхий оёдол хатгамлын хэрэглэл зэрэг байгаа юм.

Олдворын хувьд ОХУ-ын Горно-Алтайск нуруудаас олдсон булшнууд /Түрэгийн хаант улс/-ын хэлбэр, хэв маягтай адилхан байсан. Түрэгийн үед оршуулгын зан үйл хийхдээ морьтой хамт оршуулдаг байсан. Үүнээс гадна төмөр аяга, эсгий, богц уут зэргийн хамт оршуулдаг уламжлалтай байсан аж. Тиймээс эдгээр олдворын хамаарах он цагийг хувцас хэрэглэл, эд өлгийн зүйлсээр нь харьцуулсан урдчилсан судалгаагаар 6-7 дугаар зууны үе буюу одоогоос 1,500 гаруй жилийн өмнөх үеийнх гэж тогтоожээ.