Нийслэлийн хэмжээнд бүртгэлтэй 35 хүүхдийн зуслан байдгаас энэ жил 19 нь үйл ажиллагаа явуулах эрхээ аваад байгаа. Тодруулбал, Нарс, Нарлаг, Жавхлант, Ундраа, Галакси, Сансар, Янзага, Маргаашийн хөгжил, Өгөөмөр, Тэмүүлэл, Цагаан нуга, Мөрөөдөл, Цоглог, Чухаг, Хайрын билэг, Од, Шонхор, Хараацай, Найрамдал гэсэн 19 хүүхдийн зуслан сургалтын зориулалтаар ажиллана. Тэгвэл эдгээр зусланд зуны амралтаа үр дүнтэй, зөв зохистой өнгөрүүлэхэд нь дэмжлэг үзүүлэх зорилгоор амьжиргааны баталгаажих түвшингээс доогуур орлоготой өрхийн болон хүнд нөхцөлд амьдарч буй, хөгжлийн бэрхшээлтэй хүүхдүүдийг амрах эрхийн бичгээр урамшуулах тухай  А/483 дугаар захирамжийг Нийслэлийн Засаг дарга гаргасан байна.

Захирамжид хүүхдүүдийг зусланд амруулахад шаардагдах тавин сая төгрөгийг Тамгын газрын бусдаар гүйцэтгүүлсэн ажил үйлчилгээний зардлаас санхүүжүүлэхээр заасан байна. Энэхүү захирамжийн дагуу нийслэлийн ЗДТГ-ын Нийгмийн хөгжлийн бодлогын хэлтэс зусланд амрах хүүхдүүдийн судалгааг гаргаж зуслангуудад хуваарилах зэрэг ажлыг хариуцан зохион байгуулахаар болсон юм.