“Хөдөлмөр, нийгмийн хамгааллын салбарын бүхий л үйл ажиллагаа  олон түмэнд нээлттэй, ил тод байх ёстой. Манай салбарынханд тусламж дэмжлэг хүссэн хүмүүс л ханддаг. Бид чирэгдэл учруулахгүй, хүнд сурталгүй үйлчлэх үүргийг төрийн өмнө хүлээж байгаа. Тиймээс иргэний тавьсан асуудалд судлаад хариу өгье гэж хандах албан тушаалтан энэ салбарт байх учиргүй” хэмээн Хөдөлмөр, нийгмийн хамгааллын сайд С.Чинзориг яам болон харьяа газрын удирдлагуудтай хийсэн уулзалтын үеэр онцгойлон анхааруулав.



Тэрбээр сайдын ажил авснаас хойш яам болон харьяа газрын удирлагуудтай тус тусад нь уулзаж байсан бол өнөөдөр нэлээд өргөн бүрэлдэхүүнтэй цуглуулан хуралдаж үүрэг даалгавар өглөө. Сайд салбартаа сахилга хариуцлагыг чангатгахад бүгд анхаарч ажиллах ёстойг сануулаад ажлын болон төсвийн сахилга батыг чанд сахиж, бүхий л үйл ажиллагаагаа ил тод нээлттэй явуулж, зөвхөн яам, харьяа газрууд гэхгүй суманд ажиллаж байгаа мэргэжилтнийг ч олон нийт иргэдээр ажлаа дүгнүүлдэг байхыг шаардана гэв. Мөн төрийн албан хаагчидтай байгуулсан үр дүнгийн гэрээний биелэлт бодитой байх учиртай гээд ийш тийш нь бичиг шидэж, дамжуулагчийн үүрэг гүйцэтгэснээ ажил хийсэн болгож, нэр зүүхийг яавч хүлээн зөвшөөрөхгүй гэдгээ хэлсэн юм. 

С.Чинзориг сайд ажилгүйдэл, ядуурал, хүчирхийллийг бууруулахад салбарын бодлогыг чиглүүлж ажиллахын тулд нэн тэргүүнд анхаарах зүйлүүдийг нэг бүрчлэн тайлбарлаж, холбогдох газруудын дарга нарт тодорхой үүрэг өгсөн. Тухайлбал, ажилгүй, ядуу иргэдийн судалгааг хүн нэг бүрээр нарийвчлан гаргаж ур чадварт тохирсон хөдөлмөр эрхлэлтийн бодлого явуулах, зохион байгуулалттай ажлын байрыг дэмжих, ажлын байрыг хадгалах зэрэг арга хэмжээг Ажилгүйдлийн даатгалын сантай уялдуулах арга хэмжээний төлөвлөгөөг ойрын хугацаанд гаргахыг даалгав. Ядуурлыг бууруулах үндэсний хөтөлбөр боловсруулж, иргэдийг ядуурлаас хамгаалах үйл ажиллагааг санаачлан хэрэгжүүлэх нь ХНХЯ, харьяа газруудын хийх ёстой ажил. Гэр бүлийн хүчирхийлэл, ялангуяа бага насны охид хүчирхийллийн золиос болж буй аймшигт хэргүүд гарч олон нийтийг түгшээж байгаад дүгнэлт хийж урьдчилан сэргийлэх, соён гэгээрүүлэх ажлыг далайцтай явуулах, эцэг эх, олон нийтийн оролцоотойгоор хүчирхийллийг бууруулахад анхаарч ажиллахыг сануулав.

Хүүхдийн асрамж халамжийн төвүүдийн үйлчилгээний стандартыг шинэчлэх, асрамжийн төвд хүмүүжсэн хүүхдийг бие даан амьдрах чадварт сургах, насанд хүрсэн ч амьдралд хөлөө олоход нь туслах хүүхэд хөгжил, хамгааллын шинэ үйлчилгээг нэвтрүүлэх, мэргэжлийн боловсрол сургалтын салбарыг сайжруулахад чиглэсэн дорвитой шийдвэрийг Засгийн газраар гаргуулах, Монголбанк, арилжааны банкуудтай хамтран ажиллаж зээлийн хүүг бууруулах боломжийг судлах, шахаж шаардах ажлыг ч хийх ёстой гэлээ.