ХНХЯ-ны гуравдугаар давхрын хурлын танхимд Хөдөлмөр, нийгмийн хамгааллын сайд С.Чинзориг Засгийн газрын хуралдаанаар шийдвэрлэсэн төрийн албан хаагчийн албан тушаалын цалингийн сүлжээ, доод жишгийг шинэчлэн тогтоосноор аль салбарынхны цалин яаж нэмэгдэж буй талаар дэлгэрэнгүй мэдээлэл өгч байна.

ХНХЯ-ны гуравдугаар давхрын хурлын танхимд Хөдөлмөр, нийгмийн хамгааллын сайд С.Чинзориг Засгийн газрын хуралдаанаар шийдвэрлэсэн төрийн албан хаагчийн албан тушаалын цалингийн сүлжээ, доод жишгийг шинэчлэн тогтоосноор аль салбарынхны цалин яаж нэмэгдэж буй талаар дэлгэрэнгүй мэдээлэл хийж байна. С.Чинзориг:

-Шүүх прокурор болон улстөрийн албан тушаалтнуудын цалинг нэмэхгүй.

Есдүгээр сарын 1-нээс эхлэн инфляцийн түвшинтэй уялдуулан нэмж байна. Багш, эмч нартай дүйцэхүйц албан тушаалтан болон тэдгээрээс бага цалинтай хүмүүсийн цалинг 8 хувиар нэмнэ. Үйлчилгээ, төрийн захиргааны албан хаагчид зэрэг бүгд хамаарна.

Нийт 145 мянган хүний цалинг энэ оны есдүгээр сарын 1-нээс 8 хувиар нэмж байна.

Эхний ээлжинд боловсрол, эрүүл мэндийн салбарт хийгдсэн судалгаан дээр үндэслэн ангилал зэрэглэлийг шинэчлэн тогтоох ажлыг хийж байна. Эрүүл мэндийн салбарт хийгдсэн судалгаанаас хамгийн өндөр ачаалалтай нь сувилагч, боловсролын салбарт бага ангийн багш, цэцэрлэгийн багш гэж тодорхойлогдсон. Тиймээс сувилагч нарын ангиллыг хоёр ахиулах, бага ангийн багш нар, цэцэрлэгийн багш нарын ангиллыг нэг ахиулах шийдвэр гаргасан. Ингэснээр сувилагч нарын цалин 20-30 хувиар, бага ангийн багш, цэцэрлэгийн багш, тусгай хэрэгцээт сургуулийн багш нарын цалин 14 хувиар нэмэгдэнэ.

Соёл урлагийн салбарынхны цалинг 8 хувиар нэмэхийн зэрэгцээ ангилал зэрэглэлийг нь шинэчлэн тогтоож байгаа. Тиймээс энэ салбарынхны цалин 14-32 хувиар нэмэгдэнэ.

Ингээд 145 мянган төрийн албан хаагчийн цалин 8 хувиар, 28200 төрийн албан хаагчийн цалин 14-32 хувиар нэмэгдэхээр боллоо.