Монгол, Хятадын хэвлэл мэдээллийн IX форум Өмнөговь аймгийн төв Даланзадгад хотод болж байна. Хоёр улсын хэвлэл мэдээллийн хэрэгслүүдийн харилцааг сайжруулах, бие биеэсээ туршлага судлах боломж нөхцөлөөр хангахын тулд жил бүр форум зохион байгуулж байхаар тогтсон байдаг юм. Тус форумыг хоёр улс ээлжлэн зохион байгуулдаг бөгөөд энэ удаад манай улсад, тэр дундаа орон нутагт зохиогдож буйгаараа онцлог болж байна.  

МСНЭ, Өмнөговь аймагтай хамтран зохиож буй форумд УИХ-ын гишүүн, Гадаад харилцааны сайд Д.Цогтбаатар, Өмнөговь аймгийн Засаг дарга Н.Наранбаатар, Даланзадгад хотын захирагч Т.Алтансүх, Eрөнхийлөгчийн Тамгын газрын Хэвлэл мэдээллийн албаны дарга Ж.Цэсэн, БНХАУ-ын Төрийн зөвлөлийн хэвлэл мэдээллийн албаны гадаадад түгээн дэлгэрүүлэх товчооны дэд дарга Лин Ли, Бүх Хятадын сэтгүүлчдийн холбооны намын хорооны дарга Ван Дун Мэй нарын хүндтэй зочдоос гадна Хятад, Монголын 160 гаруй төлөөлөгч оролцож байна.

Форумын нээлтийн үйл ажиллагааны дараагаар хоёр орны хэвлэл мэдээллийн байгууллагуудын удирдлагууд хамтран ажиллах санамж бичгүүдэд гарын үсэг зурлаа. Тодруулбал, "Нэг бүс нэг зам" санаачилгын хүрээнд хэвлэл мэдээллийн солилцоо хамтын ажиллагааны санамж бичигт МСНЭ-ийн ерөнхийлөгч Х.Мандахбаяр, Бүх Хятадын сэтгүүлчдийн хорооны дарга Ван Дун Мэй,  Хэвлэл мэдээллийн харилцаа хамтын ажиллагааны чиглэлээр 2018-2020 он хүртэл хамтран ажиллах Санамж бичигт МСНЭ-ийн ерөнхийлөгч Х.Мандахбаяр, ӨМӨЗО-ы Ардын засгийн газрын Хэвлэл мэдээллийн албаны  дарга Жөү Чүнь Же нар гарын үсэг зурав. Мөн форумын үеэр хоёр орны төлөөлөгчид, удирдлагууд сонирхолтой илтгэлүүд тавьж, салбар хуралдаан хийлээ.

А.АКЭРКЭ