Фэйсбүүк компанийн Ази, Номхон далайн бүсийн төлөөлөгчид манай улсад ажилласан. Энэхүү үйл ажиллагааны талаар Харилцаа Холбооны зохицуулах хороо, Цагдаагийн ерөнхий газраас өнөөдөр /2018.09.13/ мэдээлэл хийлээ. Монгол Улс нийт 1.7 сая гаруй фэйсбүүк хэрэглэгчтэй байна. 

Фэйсбүүк компанийн Хонконг, Тайвань, Монголыг хариуцсан бодлогын газрын захирал Жорж Чэн "Монгол Улс нь Фэйсбүүк компаниас гаргасан “Хамрагдах интернетийн индекс-2018” судалгааны affordability (хэрэглээ) үзүүлэлтээр Ази тивд нэгд, дэлхийд 10-т ороод байгаа" хэмээн мэдээлсэн билээ.  

Фэйсбүүк компанийн төлөөлөгчид Харилцаа холбооны зохицуулах хороон дээр уулзалт хийсэн. Энэ үеэр Фэйсбүүк компанийн олон нийтийн стандартын танилцуулга хийжээ. Мөн  хувь хүний эрх, эрх чөлөөг хангах, хувийн нууцлалыг хамгаалах, хууль бус аливаа үйл ажиллагаатай хамтран тэмцэх талаар санал солилцсон байна.Үүнээс гадна “Бүс нутгийн аюулгүй байдал, хувийн нууцлал”, Монгол дахь бизнесийн орчныг дэмжих болон бусад асуудлаар зөвшилцөжээ.
Дээрх асуудлуудын хүрээнд Монгол Улс болон Фэйсбүүк компани цаашид хамтран ажиллах санамж бичиг байгуулах болсон байна. Тус  компанийн төлөөлөгчид ирэх арваннэгдүгээр сард дахин Монгол Улсад ажиллах юм .

Харилцаа холбооны зохицуулах хорооны Хамтын ажиллагаа, харилцагчийн хэлтсийн дарга Б.Мягмарнаран “Фэйсбүүк компанийн төлөөллүүдтэй иргэдийн үг хэлэх, мэдээлэл олж авах үндсэн эрхийн талаар ярилцсан. Хуурмаг мэдээллийн тархалтыг бууруулах, хуурамч хэрэглэгчийг тодорхойлох, цахим гэмт хэрэгтэй хамтран тэмцэх талаар ярилцсан юм. Үүний хүрээнд Харилцаа холбооны зохицуулах хороон дээр мэргэжлийн багийг бүрдүүлж ажиллахаар боллоо. Энэ баг нь ЦЕГ, бусад холбогдох байгууллагатай хамтран фэйсбүүк компанитай шууд холбогдон фэйсбүүкз хаягыг баталгаажуулах тал дээр хамтран ажиллах болно” гэв.

Фэйсбүүк компаниас гаргасан мэдээгээр статистик мэдээгээр зөвхөн 2018 оны нэгдүгээр улиралд 583 сая хуурмаг хаягыг устгажээ. Үүний дараах судалгаагаар 80 гаруй сая хуурмаг хаяг буйг тооцоолсон байна. Мөн Каннын медиа фестивалийн үеэр фэйсбүүкийн мэдээллийн 50 орчим хувь нь хуурмаг байгааг тогтоожээ.