Тусгаар тогтнолын ордонд 2008 оны долдугаар сарын 1-нээс ч хэцүү зүйл болж мэдэхээр байгааг гишүүд сэтгэл зовнин хэлж сууна. М.Энхболд, У.Хүрэлсүх нарын дундуур хөндлөнгийн хар муур гүйж, түүнээс улбаалан журмын нөхдөө хөлдөө чирж, баг, бүлгээрээ аавын хаалга татаж мэдэх дүр зураг ч үүслээ.
АН Засагласан 2012-2016 онд эрх мэдэл, эд хөрөнгийн төлөөх өнөөдрийнх шиг хагаралдаан эцэстээ олон гишүүнээ дээл нөмрөхөд хүргэж, зарим нь өдгөө ч хэцүү нэртийнд хоноглож байгаа. Ийм тавилан МАН-ын парламент дахь болон гаднах нөхдийг нь ч хүлээж байна.
Үнэндээ 60 тэрбумын гэдгээр амаа таглуулж, асуултад ээрэгдэж байсан М.Энхболдод өөр бас нэг нууц байсан аж. Прокурор, АТГ гээд хүчний байгууллагуудыг атгачихсан Миеэг 60 тэрбумын гэх хэргээр ховхлох гээд дийлэхгүй байгааг бид харж байна. Чуулганы танхимд том дуугарч, гишүүдийг зандарч, Б.Батзоригийг гавлаад гарах шахсан Ерөнхий прокурор М.Энх-Амгаланг УИХ-ын дарга М.Энхболдын санал болгосны дагуу Ерөнхийлөгч асан Ц.Элбэгдорж тохиролцож, томилсон гэдгийг бүгд мэднэ. Тиймдээ ч 60 тэрбумын хэрэг зохиомол хэрэг болон хаагдсан гэж хардсаар байгаа. Нийслэлийн ерөнхий прокурорын орлогч Ж.Ариунаа хэвлэлд өгсөн ярилцлагадаа “М.Энхболд, Ц.Сандуй, А.Ганбаатар нар албан тушаал наймаалцсан нь тогтоогдоогүй. Бичлэг эх хувь нь биш учир шинжээчийн дүгнэлт гаргах боломжгүй” гэсэн нь дээрх хардлагыг улам бүр бататгаж байгаа юм.
Гэтэл юун 60 тэрбум, дахиад 170 тэрбумын хэргийг М.Энхболд дарчихаад байна гэсэн мэдээллийг эх сурвалжаас өглөө. Түүний эл хэргийг шалгуулахаар Ерөнхий сайд У.Хүрэлсүх АТГ-т ч өгсөн гэнэ. Харамсалтай нь, Авлигатай тэмцэх газар өнөөдрийг хүртэл хөдлөөгүй гэдгийг эх сурвалж онцлов. Тиймээс Прокурорын байгууллага, АТГ-ын ард нуугдчихаад байгаа М.Энхболдыг УИХ-ын даргын ажлаасаа чөлөөлөгдөх хүсэлтээ өгөхгүй бол тэрхүү хав дарагдчихаад байгаа 170 тэрбумын хэргийг ил гаргаж тавина гэдгийг Ерөнхий сайд У.Хүрэлсүх өөрт нь хэлсэн гэнэ. Түүнчлэн Миеэг хамгаалан боргоод байгаа УИХ-ын гишүүн Ж.Мөнхбатад хүртэл “Ж.Мөнхбат аа, чиний нүүрс хулгайлсныг наад М.Энхболд чинь баталж байгаа шүү” гэж шулуухан хэлжээ. У.Хүрэлсүхийн хэлснээр УИХ-ын гишүүн Ж.Мөнхбат УИХ-ын дарга М.Энхболдыг цээжээрээ хамгаалаад байгаагийн цаад нууц энэ гэнэ. АТГ М.Энхболдын гарт байгаа учраас мань хүний нүүрсний хэрэг дэлгэгдэх нь цаг хугацааны асуудал гэдгийг ч Хүк хэлсэн бололтой. Мөн Д.Оюунхоролын 750 шонхрын наймааны асуудал ч шалгагдалгүй хав даруулсан нь өнөөх М.Энхболдын гавьяа аж. Тэд спикерийн уурыг хүргэх төдийд хамаг булхай нь илчлэгдэх тул тийнхүү нүүрэн дээр нь хулгай хийж, худал хэлж байсан ч хамгаалахаас өөр сонголт үлдээгүй бололтой.