-АН-ын дарга, удирдлагууд удахгүй ирээд баяр хүргэх байх-

Засгийн газрыг огцруулах асуудлыг өнгөрсөн долоо хоногт УИХ-аар хэлэлцэн шийдвэрлэсэн. Уг асуудлаар УИХ дахь АН-ын бүлэг нэгдмэл байр суурьт хүрч, У.Хүрэлсүхийн тэргүүлсэн Засгийн газрыг огцруулах нь зүйтэй гэж үзсэн ч Л.Болд, Ж.Батзандан, Д.Мурат нар бүлгийн шийдвэрээс зөрж эсрэг санал өгсөн. Тэгвэл энэхүү үйлдлийнх нь төлөө өнөөдөр АН-ын Үндсэн дүрмийн хороо хуралдаж, дээрх гишүүд намын шийдвэрийг зөрчсөн тул улс төрийн хариуцлага тооцохоор шийдвэрлэсэн. Мөн энэ асуудлаар УИХ дахь АН-ын бүлэг хуралдаж буй юм. Тэгвэл энэ асуудлын талаар УИХ-ын гишүүн Ж.Батзандан “УИХ-ын гишүүн бол Үндсэн хуульд заасны дагуу “Нийт иргэн, улсын ашиг сонирхлыг эрхэмлэн дээдэлж, хамгаалж ажиллана” гэж төрийн сүлднийхээ өмнө тангараг өргөдөг. Намын Улс төрийн зөвлөлийн шийдвэр нь нийт үндэстний эрх ашигтай зөрчилдөх юм бол Үндсэн хуулиа барьж ажиллах ёстой. Тэгэхээр Үндсэн хуулиа баримталж ажилласан, МАНАН-ын эсрэг тэмцсэн, 60 тэрбумын бүлэглэлийн эсрэг тэмцсэн УИХ-ын гишүүддээ АН-ын дарга удирдлагууд, баяр хүргэх байх гэж бодож байна. Удахгүй ирээд баяр хүргэх болов уу. Манай зарим нөхөд андуураад МАНАН-ын талд саналаа өгчихсөн юм шиг байна лээ. Тэд санаатайгаар өгөөгүй байх. Жаахан төөрөлдсөн болов уу. Намайг хувийн ашиг сонирхлоор кноп дарсан гэж хардаж байна. Хардах хэрэггүй. Би өөрийгөө улс төрд 15 настайгаасаа эхэлж бэлтгэсэн хүн. 15 настай байхдаа Монголыг өөрчилнө гэж өөртөө хэлсэн. Батзандангийн МАНАН-г унагаах тэмцэл одоо л эхэлж байна” гэв.