Өнөөдрөөс эхлэн хот хоорондын нийтийн зорчигч тээврийн автобуснууд ердийн цагийн хуваарийн дагуу тээвэрлэлт гүйцэтгэж байгаа. Баруун аймгуудын ихэнх нутгаар хүйтний эрч чангарч, зарим газраар цасан шуурга шуурч болзошгүй, мөн автозамын гадаргууд мөсөн бүрхүүл тогтож, халтиргаа гулгаа үүссэн байгаа аж. Иймд орон нутагт зорчиж буй иргэд, жолооч нар тээврийн хэрэгслийн бүрэн бүтэн байдлыг хангуулж, шатах тослох материалын нөөцтэй замд гарах, өгсүүр уруу, даваа гүвээнд замын нөхцөлийг зөв тооцоолж, тохирох хурдыг сонгон анхаарал болгоомжтойгоор хөдөлгөөнд оролцохыг Автотээврийн газраас зөвлөжээ.