ЭМЯ-наас COVID-19 халдварын нөхцөл байдал манайд болоод бусад улс оронд ямар байгаа талаар ээлжит мэдээллээ хүргэж байна. Энэ үеэр ХӨСҮТ-ийн захирал Д.НЯМХҮҮ “Франц иргэний тохиолдлын хавьтал болох 88 хүний давтан шинжилгээнд коронавирус илрээгүй. Франц иргэний биеийн болон сэтгэл санааны хувьд хэвийн байгаа. ХӨСҮТ-д тусгаарлагдсан нэг, Баян-Өлгий аймагт тусгаарлагдсан нэг иргэнд мөн вирус илрээгүй.  

3 сарын 16-нд БНСУ-аас ирж тусгаарлагдсан хоёр, Франц улсаас дамжин ирж тусгаарлагдсан нэг иргэний шинжилгээнээс вирус илэрч Монгол Улсад батлагдсан тохиолдлын тоо нийт 4 болж бүртгэгдлээ. Гурван тохиолдлын ойрын хавьтал болох 111 хүнийг тусгаарласан. Үүнээс 61 хүнд шинжилгээ хийхэд коронавирус илрээгүй.  Шинжилгээ үргэлжилж байна. Онгоцонд байсан хүмүүсийг ажиглалт, тусгаарлалтанд аваад хариу гаргаж үзэхэд бүгдэнд нь коронавирус илрээгүй. Гурван тохиолдлын нэг нь 37, нөгөө нь 50 гаруй, үлдсэн нэг нь 60 гаран настай хүмүүс” гэлээ.