ЭМЯ-наас ээлжит мэдээллээ хийлээ. Энэ үеэр ХӨСҮТ-ийн захирал Д.Нямхүү "Хойд хилээр 2020 оны гуравдугаар сарын 26-27-нд шилжих шөнө орж ирсэн иргэний давтан шинжилгээнээс коронавирус илэрсэн. Энэ хүнийг ХӨСҮТ-д авчран тусгаарлаж эмчилгээнд оруулсан. Өмнө нь батлагдсан тохиолдлын хавьтлуудыг тусгаарласан байсан учраас ойрын хавьтал болох 15 хүнийг авчирч хяналтад оруулсан. Хавьтлуудын судалгаа үргэлжилж байна” гэв.

Харин ХӨСҮТ-ийн Тандалт судалгааны албаны дарга А.Амбасэлмаа “Коронавирус илэрсэн хүний анхны шинжилгээний хариу гуравдугаар сарын 28-нд сөрөг гарч байсан бол 2020 оны дөрөвдүгээр сарын 7-8-нд шилжих шөнийн давтан шинжилгээгээр коронавирус илэрсэн. Гаднаас халдвар авч орж ирсэн гэсэн үг. Хойноос орж ирэхдээ хүмүүс явганаар орж ирдэг гэдгийг хүмүүс мэдэж байгаа. Машинд хамт явсан гурван хүнийг Сэлэнгэ аймагт тусгаарлаж эхний шинжилгээнүүдийг авсан. Ойрын хавьтлуудаас авсан шинжилгээний хариунууд маргааш гарна” гэв.