Эрүүл мэндийн яамнаас өнөөдөр ээлжит мэдээллээ хийсэн билээ. Энэ үеэр ХӨСҮТ-ийн захирал Д.Нямхүү ”Нийт таван лабораторид 307 хүнд шинжилгээ хийлээ. ХӨСҮТ-д тусгай үүргийн онгоцоор ирсэн 275 хүн, Дорнод аймагт тандалтын зорилгоор хийгдсэн зургаан хүнд коронавирус илрээгүй. Дархан-Уул аймагт 26 жолоочид хийсэн шинжилгээнээс мөн коронавирус илрээгүй. Харин 5 дугаар сарын 3-нд Франкфурт-Улаанбаатарын тусгай нислэгээр ирсэн нэг иргэнд давтан шинжилгээ хийхэд коронавирусийн халдвар илэрлээ. Ингэснээр Монгол Улсад нийт батлагдсан тохиолдол 41 боллоо. Үүнээс 13 хүн нь эдгэрч гарсан байгаа. Манай ХӨСҮТ-д эмчлэгдэж байсан Туркийн иргэн эдгэрээд өнөөдөр дараагийн хяналтын байр руу шилжиж байна. 33 хоног эмчилгээ хийлгэсэн. Ингээд ХӨСҮТ-д эмчилгээ хийлгэсэн гадаадын бүх иргэн эдгэрч гарсан гэсэн үг" гэлээ.