Улаанбаатар хотын долоон дүүрэг, таван аймгийн 37 сумын хүн, малыг ундаалдаг Туул голын бохирдол өдгөө гамшгийн хэмжээнд хүрсэн гэдэгтэй маргах хүн үгүй. “Туул гол бохироор урсаж байна”, “Туул гол хогийн сав биш” гэх зэргээр түмэн асуудлын үүр уурхай болсоор нэлээдгүй хугацаа өнгөрчээ.
Жил бүр хэд хэдэн удаа Туул голын эргийн хогийг цэвэрлэх кампанит ажил төрийн болон цөөнгүй төрийн бус байгууллагын санаачилгаар өрнөдөг ч хог нь барагдана гэж үгүй.
Тэгвэл эл асуудлыг Монгол Улсын гавьяат тамирчин О.Насанбурмаа хөндөж “ХАТАН ТУУЛАА ЦЭВЭРЛЭЕ” гэсэн уриалга гаргаж, өөрийн цахим хуудсаараа дамжуулан мэдээлэл хүргэсэн билээ. Энэхүү уриалгыг нь “Мянганы Санаачилга Хөгжлийн Төлөө” ТББ-ынхан ажил хэрэг болгож зуны эхэн сарын шинийн нэгний өдөр буюу өнгөрөгч Бямба гарагт Хан-Уул дүүргийн 18 дугаар хорооны нутаг дэвсгэрээр урсан өнгөрч буй туул голын эрэг, хөвөө, бургасан доторх хогийг цэвэрлэсэн байна.
Мөн гавьяатын уриалгыг дэмжиж чөлөөт бөхийн “Женко” клубын тамирчид, Сонгинохайрхан дүүрэг дэх Монголын авто сургалтын байгууллагуудын нэгдсэн холбооны салбар зөвлөл, Төгс сайн авто сургууль, Буянт сэргэлэн ХХК, Хан-Уул дүүргийн Тохижилт үйлчилгээний төв, хувь хүмүүс гээд 80 орчим хүн тус сайн дурын ажилд оролцжээ.
Түүгээр ч зогсохгүй Сонгинохайрхан дүүрэг дэх Монголын авто сургалтын нэгдсэн холбооны салбар зөвлөлөөс 250 ширхэг шуудай, Буянт сэргэлэн ХХК-иас 150 ширхэг маск хандивлаж оролцжээ.
“Зориулалтын жорлон байтугай хогийн сав ч байхгүй учир бохир, хаягдал, ялгадасаар дүүрэн байлаа. Тухайлбал, хэрэглэсэн нойлын цаас, ариун цэврийн хэрэглэл, хуурай, нойтон сальфетка зэргээ үлдээгээд явдаг нь байгаль орчныг хамгийн ихээр бохирдуулжээ. Энэ нь Туул голын эрэг дагуу агаарлаж, зугаалж яваа хүмүүст ч маш их тав тухгүй байдал үүсгэж байгаа нь анзаарагдсан. Иймд хүмүүст хандаж хэлэхэд энэ төрлийн хогоо ч мөн аваад явдаг байх хэрэгтэй” хэмээн аянд нэгдсэн залуус хэлж байсныг энд онцлох нь зүйтэй болов уу.
Дээрх арга хэмжээнд оролцсон аж ахуй нэгж, хувь хүн бүрт “Мянганы Санаачилга Хөгжлийн Төлөө” ТББ-ынхан дурсгал болгон “Талархал” гардуулсан байна.
Мөн “Мянганы Санаачилга Хөгжлийн Төлөө” ТББ-аас зохион байгуулсан “ХАТАН ТУУЛАА ЦЭВЭРЛЭЕ” аянд идэвх санаачилгатай оролцсон МУГТ О.Насанбурмаад болон Чөлөөт бөхийн Женко Клубын тамирчид , СХД дэх Монголын авто сургалтын байгууллагуудын нэгдсэн холбооны салбар зөвлөл, “Төгс сайн” авто сургууль, “Буянт сэргэлэн хайрхан” ХХК, Хан-Уул дүүргийн Тохижилт үйлчилгээний хэлтэс, хувь хүн, хамт олонд дахин гүн талархал илэрхийлснийг энэхүү мэдээллээрээ дамжуулан хүргэе.
