1990-ээд онд дэлхий нийтийг шуугиулж явсан Моника Левински хэмээх бүсгүй  өнөөдөр санах хүн бараг алга болжээ. Цагтаа Цагаан ордны эзнийг суудлаас нь унагах шахан, хэвлэлийн од болж явсан тэрээр өнөөдөр хэн ч үл анзаарагдан Нью-Йоркт амьдарч байна.  
Ерөнхийлөгч Билл Клинтонтой нууц амрагийн холбоо тогтоосноороо дэлхий нийтийн чихийг дэлдийлгэж, энэ асуудлаас болж ноён Ерөнхийлөгч огцрохдоо тулж байсан 1990-ээд оны их дуулианаас хойш Моника Левински олны нүднээс холхон байхыг хичээсний дүнд өнөөдөр тэрээр бараг мартагдаж орхиж.
Залуу байсан үеэсээ хавьгүй жин нэмж, эв хавгүй хувцасласан 40 орчим насны энэ эмэгтэйг тэртээ 14 жилийн өмнө олон улс даяар шуугиан тарьсан өнөөх Моника Левински гэж танихад ч бэрх болжээ. Аль хэдийнэ 39 хүрсэн ч одоо хүртэл хүнтэй гэрлээгүй тэрээр нэгэн үе өндөр үнэтэй байр хөлслөн амьдарч байгаад одоо ээжтэйгээ хамт амьдарч байгаа аж. Тэрээр сарын 7450 ам.долларын хөлс төлдөг түрээсийн байрнаасаа ээжийнх рүүгээ нүүж ирээд нам гүм амьдарч буй гэнэ.

Гэхдээ тэрээр бас ч зүгээр суугаагүй. АНУ-ын Ерөнхийлөгчтэй холбогдсон явдлаа нэгд нэгэнгүй өгүүлсэн томоохон ном гаргахаар ажиллаж байгаа аж.   Номондоо тэрээр Билл Клинтонтой үүсгэсэн харилцаа болон Цагаан ордны ажилтан Томас хэмээх залуугаас хүүхэдтэй болоод алдсан гээд өөрийнхөө амьдралын түүхийг өгүүлэх аж.
Моника Левински өөрийнхөө дэгдээсэн шуугианаас хойш олны хараанаас зугтахын тулд 2005 онд Лондоны Эдийн засгийн сургуульд нийгмийн сэтгэл зүйн чиглэлээр магистер хамгаалсан юм. Түүний магистрын судалгааны ажил “Шүүх хурлаас өмнөх хувь хүний талаарх хэвлэлийн мэдээлэл, гуравдагч хүний нөлөөнд судалгаа хийх нь” гэсэн нэртэй байжээ.