Украин улсын иргэн 33 настай эрэгтэй Сергей, 24 настай эрэгтэй Юрий нар Сүхбаатар, Чингэлтэй, Баянгол, Баянзүрх дүүрэгт байрлах банкны бэлэн мөнгөний машин /АТМ/-аас хуурамч карт ашиглан их хэмжээний мөнгө залилсан байна.
Цагдаагийн байгууллагад уржигдар банкны бэлэн мөнгөний машинаас их хэмжээний мөнгө алдагдсан тухай мэдээлэл иржээ. Энэ дагуу УМБГ, ЭЦГ, Сүхбаатар дүүргийн Цагдаагийн хэлтсийн ажилтнууд шуурхай ажиллаж, хуурамч карт ашигласан дээрх хоёр иргэнийг илрүүлэн баривчилсан гэнэ. Украины дээрх иргэд 13 удаагийн үйлдлээр банкны бэлэн мөнгөний машинаас 100 орчим сая төгрөг залилсан нь тодорхой болжээ. Тэд тавдугаар сарын 24-нд /өчигдөр/ ОХУ-ын Москва хот руу нисэх билет авсан байсан гэнэ. Сергей, Юрий нарыг хорьж, хэргийг УМБГ-ынхан үргэлжлүүлэн шалгаж байна.