2008 онд байгуулагдсан хамтарсан Засгийн газрын мөрийн хөтөлбөрт тусгасан “Хүний хөгжил сан”-гаас иргэн бүрт олгох 1.5 сая төгрөгийг бүрэн олгож дууссан тухайгаа өчигдөр Хөдөлмөр халамж үйлчилгээний газар тайлагнав. Иргэд эл мөнгөний багахан хэсгийг хүртэж, үлдсэнийх нь барааг ч харж амжаагүй байхад ийн тайлагнасан нь гайхшрал төрүүлснийг нуух юун. Гэхдээ тэдний хийсэн мэдээлэл нь дээрх мөнгийг өгөөд дууссан бус хэдэн хувийг нь ямар байдлаар олгосон үлдсэнийг нь хэрхэн олгохтой холбоотой байсан юм.

Иргэдэд 500 мянган төгрөгийг 2010 оноос хойш цувуулж бэлнээр олгоод байгаа. Харин үлдсэн нэг сая төгрөгийг ахмад настан болон хөгжлийн бэрхшээлтэй иргэдэд бэлнээр, бусдад нь хувьцаа хэлбэрээр шилжүүлж  “Эрдэнэс Таван толгой”  хувьцаат компанийн 1072 ширхэг хувьцааг эзэмших болоод буй.  Тэгвэл эл хувьцаагаа худалдах хүсэлтэй иргэдийн судалгааг гаргахад нэг сая 532 мянган иргэн хүсэлтээ ирүүлжээ. Эдгээр иргэний хувьцааг дотоодын аж ахуйн нэгжүүдэд худалдах ажлыг Засгийн газрын харьяа байгууллагууд зохион байгуулж эхлээд удаагүй. Үүнтэй холбоотойгоор Засгийн газрын уржигдрын хуралдаанаар “”Эрдэнэс Таван толгой” ХК-ийн хувьцааг худалдах, иргэн бүрт хувьцаа эзэмшүүлэх, иргэдийн хувьцааг Засгийн газар худалдан авах үйл ажиллагааг зохицуулах журам” баталжээ. Уг журамд тусгаснаар хувьцаагаа худалдах хүсэлт гаргаагүй л бол нөхөж хүсэлт хүлээн авахгүй гэнэ. Харин хувьцаагаа худалдах хүсэлт гаргасан иргэн шийдвэрээ өөрчилж, хувьцаа эзэмших хүсэлт гаргаж болох бөгөөд ийм хүсэлтийг  наймдугаар сарын 1 хүртэл хүлээж авах гэнэ. Одоогоор 5000 хүн шийдвэрээ өөрчилж бэлэн мөнгө бус хувьцаа авахаар болжээ.
Мөн иргэн хүсвэл өмнө нь бэлэн бусаар хүртсэн хишиг хувийн мөнгөө буцаан төлж, түүнд ногдох хувьцаагаа эзэмшиж болох аж.