“Тринозаурус Батаар” үлэг гүрвэлийн ясны хэрэгт Ерөнхийлөгч Ц.Элбэгдоржийг төлөөлж, нэхэмжлэл гаргасан АНУ-ын иргэн, өмгөөлөгч Роберт Пэйнтер хамтрагч Ларри Юьрс, Адам Кейг нартай хамт өнөөдөр Ерөнхийлөгчийн Тамгын газрын дэргэдэх Иргэний танхимд хэвлэлийн бага хурал хийлээ. Тэд үлэг гүрвэлийн ясны талаархи хамгийн сүүлийн үеийн мэдээллийг сэтгүүлчдэд өгсөн юм.
Өмгөөлөгч Роберт Пэйнтерийн хэлснээр “Тринозаурус Батаар”-ыг хоёр сарын дараа гэхэд эх оронд нь авчирах юм байна. Одоогоор энэ хэргийг АНУ-ын Холбооны шүүхэд шилжүүлсэн байгаа гэнэ. “Тринозаурус Батаар”-ыг АНУ-ын иргэн Эрик Прокопи гэгч худалдсаныг тогтоожээ. Тэрээр Их Британийн Нэгдсэн Вант Улсын иргэн Пис Мортой хамтран ямар ч зөвшөөрөлгүйгээр үлэг гүрвэлийн ясыг АНУ-ын хилээр оруулсан байна. Мөрдөнбайцаалтын явцад Эрик Прокопи үлэг гүрвэлийн ясыг Японоос худалдаж авсан хэмээн мэдүүлсэн аж. АНУ-ын хилээр оруулахдаа “гүрвэлийн яс” 15 мянган ам.долларын үнэтэй хэмээн мэдүүлжээ. Гэхдээ дуудлага худалдаанд оруулахдаа нэг сая гаруй ам.долларын үнэтэй, Монголоос гаралтай динозаурын яс хэмээн мэдэгдсэн байжээ. Энэ бол түүний үлэг гүрвэлийн яс худалдсан анхны тохиолдол биш, дөрөв дэх удаагийн үйлдэл байсан гэдгийг өмгөөлөгч хэлж байв.
Тиймээс АНУ-ын Холбооны шүүх түүний эл хууль бус үйлдэлд арав хүртэл жил хугацаагаар хорих ял, дээр нь мөнгөн торгууль ногдуулж магадгүй гэдгийг ч өмгөөлөгч Роберт Пэйнтер хэллээ.