Германы Засгийн газар олон нийтийн сүлжээ Facebook-ээр үзэн ядсан сэтгэгдэл илгээхийг хориглосон хуулийн төсөл өргөн барьсанд тус сүлжээний удирдлага шүүмжлэлтэй хандаж байгаагаа мэдэгдлээ гэж Die Zeit мэдээлжээ.

Германы Хуульзүйн сайд Хайко Маасын санаачилж өргөн барьсан төсөлд хүмүүсийн нийтлэлд оруулсан  ийм тааламжгүй сэтгэгдлийг Facebook өөрөө 24 цагийн дотор, онцгой нөхцөлд 7 хоногийн дотор сүлжээнээс авч байхаар тусгасан юм байна. Хэрэв ингээгүй тохиолдолд Facebook компанийг 50 сая еврогоор торогохоор хуулийн төсөлд тусгажээ.

Харин Facebook-ийн төлөөлөгч ийм сэтгэгдэл түгсэн тохиолдолд тухайн эрхзүйт төр, улс хариуцлага тооцох ёстой гэж үзэж байна.

Германы энэ хуулийн төсөл үүний зэрэгцээ Сэтгүүл эрхлэгчдийн холбооны зүгээс бас  эсэргүүцэлтэй тулгарч “Үг хэлэх эрх чөлөө”-г хязгаарлах гэлээ хэмээн шүүмжлүүлж байгаа юм.

Харин сайд Маас  “Үг хэлэх эрх чөлөө нь эрүүгийн эрх эхэлж байгаа тэр цэгт төгсгөл болдог. Бид үг хэлэх эрх чөлөөний эсрэг биш, харин бид хувь хүн, үндэсний эрх ашгийн эсрэг сэтгэгдлийн эсрэг байгаа юм” гэж  хэлсэн байна.