Нийслэлийн төвийн зургаан дүүрэгт цахилгаан, дулаан үйлдвэрлэх, түгээх, зохицуулалттай хангах тусгай зөвшөөрөлтэй 22 аж ахуйн нэгж, байгууллагаас бусад бүх төрлийн нам даралтын халаалтын зууханд 2020 оны 09 дүгээр сарын 15-ны өдрөөс эхлэн түүхий нүүрс хэрэглэхийг хориглох тухай Нийслэлийн Засаг даргын 2019 оны 12 дугаар сарын 26-ны өдрийн А/1377 дугаар захирамж гарсан.
Өнөөдөр уг ажлыг зохион байгуулах Ажлын хэсгийн дарга, Улаанбаатар хотын Ерөнхий менежер бөгөөд Улаанбаатар хотын ерөнхий менежер Т.Гантөмөр нь ажлын хэсгийн гишүүдэд НЗД-ын захирамж, захирамжийг хэрэгжүүлэх ажлын төлөвлөгөөг танилцуулж эхний хурлаа хийж 6 хэлтсийн даргаар ахлуулсан дэд ажлын хэсгийг байгууллаа.
Ажлын хэсгийн хуралд оролцсон Эрчим хүчний яам, Эрчим хүчний зохицуулах хороо, Цагдаагийн Ерөнхий газар, НЗДТГ, УБЗАА, Нийслэлийн Мэргэжлийн хяналтын газар болон нийслэлийн Засаг даргын хэрэгжүүлэгч агентлаг, цахилгаан, дулааны хангагч төр, орон нутгийн өмчит газрын удирдлагууд ажлын төлөвлөгөө хэлэлцэж, тухайн жилд төр, хувийн хэвшлийн байгууллагатай хамтран хийх ажлаа тодорхойлов.
Эхний ээлжинд тусгай зөвшөөрөлгүй 100 кВт-аас дээш хүчин чадалтай 136 халаалтын зуух эзэмшигч иргэн, аж ахуйн нэгж байгууллагуудтай 2020 оны 01 дүгээр сарын 08-ны өдрийн 17 цагт Хангарьд ордны 14 давхрын Их танхимд хамтарсан уулзалтыг зохион байгуулж, цаашид авч хэрэгжүүлэх арга хэмжээний төлөвлөгөөг танилцуулах юм.
