ЭМЯ-ны Төрийн нарийн бичгийн дарга Я.Амаржаргал В, С вирусний илрүүлэг шинжилгээ хийлгэсэн 90 мянган хүний хариу худлаа гарсан гэх мэдээлэлд тайлбар өглөө.

Тэрбээр ““Элэг бүтэн Монгол” бол хамгийн сайн хэрэгжиж байгаа хөтөлбөр. 2.7 сая хүнээ 2.5 жилийн хугацаанд энэ шинжилгээнд хамруулах ёстой. Одоогоор 1.3 сая хүн энэ шинжилгээнд хамрагдсан байна. Тэдний 10 орчим хувь нь С вирус, найм орчим хувь нь В вирусний халдвартай гэж гарсан.

Гэвч сүүлийн үед 90 мянган хүний шинжилгээ худлаа гарсан гэх мэдээлэл цацагдах боллоо. Эрүүл мэндийн яам энэ мэдээллийг хүлээн зөвшөөрөхгүй. 90 мянган хүний шинжилгээний хариу буруу гарсан гэдэг нь ташаа мэдээлэл. Тэгээд ч ДЭМБ Монголд ийм судалгаа хийгээгүй. 

ДЭМБ-ын 12 эксперт ЭМЯ-ны Хяналт шинжилгээ үнэлгээний багтай хамтарч “Элэг бүтэн Монгол” хөтөлбөрийн дунд хугацааны үнэлгээ хийгээд явсан. Үнэлгээгээр дэлхийн аль ч оронд хийж чадаагүй ажлыг хийсэн байна гэж үнэлсэн” гэв.