Онцгой байдлын ерөнхий газрын дарга Т.Бадрал Улсын Онцгой комиссын хуралдаанаар шийдвэрлэсэн асуудлын талаар саяхан мэдээлэл өглөө.

Тэрбээр “Шинэ коронавирусийн халдвар авсан хүмүүсийн тоо өдөр өдрөөр өсч байна. Үүнтэй холбоотойгоор хуралдлаа.

Бид зайлшгүй шинэ төлөвлөгөө гаргаж ажиллах шаардлагатай болж байна. Тиймээс хэд хэдэн шийдвэр гарсан. Тухайлбал шувууны ханиадтай холбогдуулж тахианы мах болон тахианы махтай бүтээгдэхүүнүүдийг хориглох шийдвэр гарч байна. Мөн хилийн боомтуудын асуудлыг ярилаа. Ихэнх боомтууд хаагдсан учир жаахан хүндрэл үүсч буй. Эх орондоо ирэх хүсэлтэй хүмүүсийн тоо ч нэмэгдсээр байна. Өчигдөр гэхэд  360 орчим иргэн ирсэн. Ер нь өдөртөө 300 гаруй хүн ирж байна. Үүнтэй холбоотойгоор хилийн боомтуудын халдвар, хамгааллын асуудал нэлээд ярвигтай болж ирж байна гэсэн үг.

Тэгэхээр ажиллаж байгаа хилийн боомтууд дээрээ Онцгой комиссын ажлын хэсэг ажиллуулах хэрэгтэй болж ирж байна. Салбарын төлөөлөл маргааш гарна.

Улсын Онцгой комисс маргааш дахин хуралдаж, саналаа Засгийн газарт танилцуулна. Хөрөнгө мөнгөтэй холбоотойгоор Эрүүл мэндийн салбараас нэлээд өндөр үнийн дүн орж ирсэн. Дэлхий нийтийн жишиг бол тусгаарласан нэг эмнэлэг бэлтгэх шаардлагатай гэж үзэж байгаа. Тиймээс Эрүүл мэндийн салбарынхан ямар эмнэлгийг тусгаарлах вэ гэдгийг судлах юм. Ер нь бол сэжигтэй тохиолдлуудыг хүлээж авах нэгдсэн нэг цэгтэй болно гэж ойлгож болно.

Ерөнхийдөө Цэргийн эмнэлэг, Төрийн тусгай хамгаалалттай ажилтнуудын эмнэлгийг орой судлаад ЭМЯ шийдвэрээ гаргана” гэлээ.