Нийслэлийн онцгой комиссын 01 дүгээр албан даалгаврыг хэрэгжүүлэх ажлын хүрээнд Улаанбаатар хотын Ерөнхий менежерийн 2020 оны тушаалаар Нийслэлийн нутаг дэвсгэрт хаврын шар усны үерээс урьдчилан сэргийлэх, ус зайлуулах барилга байгууламжийн хэвийн найдвартай үйл ажиллагааг хангаж, ус нэвтрүүлэх чадварыг нэмэгдүүлэх, шугам сүлжээнд үзлэг шалгалт явуулж гүйцэтгэл, үр дүнд хяналт тавих үүрэг бүхий ажлын хэсэг байгуулсан. Хотын инженерийн байгууламжийн хэлтсийн даргаар ахлуулсан ажлын хэсэг хуралдлаа.

Хурлаар батлагдсан удирдамж, төлөвлөгөөний дагуу ажиллаж байгаа явцыг танилцуулж Баянзүрх дүүргийн 27 дугаар хороо, 10 дугаар хороо, Сүхбаатар дүүргийн 18 дугаар хороо, 20 дугаар хороо, 14 дүгээр хороо, 17 дугаар хороо, Чингэлтэй дүүргийн 17 дугаар хороодын нутаг дэвсгэрт шар ус, булийн ус, халиа дошин үүсэж байгаа нөхцөл байдал дээр 2020 оны 03 дугаар сарын 21-ний өдөр газар дээр нь шалгаж зөвлөмж гаргахаар боллоо.