ЭМЯ-наас ээлжит мэдээллээ хийлээ. Энэ үеэр ХӨСҮТ-ийн дарга Д.Нямхүү "Гуравдугаар сарын 17-ны өдөр Берлин-Москва-Улаанбаатар чиглэлийн тусгай онгоцоор ирсэн батлагдсан тохиолдлуудын ойрын хавьтал болох 75 хүний шинжилгээнээс коронавирусийн халдвар илрээгүй. Мөн 156 хүний шинжилгээ үргэлжэн хийгдэж байна. Истанбул-Улаанбаатарын онгоцоор ирж ХӨСҮТ-д тусгаарлагдсан 24 хүний шинжилгээний хариу сөрөг буюу коронавирусийн халдвар илрээгүй. Үүргийн онгоцоор ирсэн бүх хүмүүсийг дэс дараатайгаар шинж тэмдгийг нь хянаж, шинжилгээнд хамруулах төлөвлөгөөтэй ажиллаж байгаа.
Энэ сарын 18-ны өдөр Сэлэнгэд тусгаарлагдсан гурван хүний шинжилгээний хариу сөрөг гарсан. 19-нд Хэнтий аймагт нэг сэжигтэй тохиолдол тусгаарлагдсан. Тандалт судалгаа хийгдэж байна. Шинжилгээ нь наашаа ирж байгаа. Хавьтал болох автобусанд хамт явсан 24 хүнийг шинжилгээний хариу гартал тусгаарласан байгаа. Энэ иргэн Дорнод аймгийн Хавиргын боомтоор орж ирсэн. Одоогийн байдлаар коронавирустэй 6 хүний 1 нь их хүнд, 5 хүний биеийн байдал тогтвортой байна” гэв.
Мөн мэдээллийн үеэр ЭМЯ-наас Оношлуураа тусламжаар, Засгийн газрын хөрөнгөөр авч байгаа гэсэн ч PCR машинд зарцуулж байгаа урвалж бодис, үйл ажиллагааны зардал өндөр. Нэг хүний шинжилгээний зардалд 169 мянган төгрөг зарцуулж байгаа. Одоогийн байдлаар иргэддээ 700 сая төгрөгийн шинжилгээ хийсэн байна гэв.
