Өнөөдрийн байдлаар манай улсад коронавирусийн 10 халдвар бүртгэгдээд буй. Хамгийн эхний тохиолдол энэ сарын 10-нд Монгол Улсад ирсэн Францын иргэний шинжилгээнээс илэрсэн. Тэгвэл манай улсын анхны тохиолдол болсон Франц иргэний биеийн байдал дээрсэн гэх мэдээллийг ЭМЯ-наас өдөр бүр өгч байсан. Тэгвэл өнөөдрийн мэдээллийн үеэр ХӨСҮТ-ийн Ерөнхий захирал Д.Нямхүү “Тусгаарлагдсан хүмүүсээс коронавирус илрээгүй. 2020 оны 3 сарын 22-ны байдлаар Монгол Улсын хэмжээнд халдварын болоод сэжигтэй тохиолдол нэмж бүртгэгдээгүй сайхан мэдээ байна. 10 хүний биеийн байдал дунд зэрэг, тогтвортой байна. Хоёр хүнд байсан хүний биеийн байдал сайжирч тогтворжсон. Сонирхуулж хэлэхэд, манай эмч Франц иргэний уушгийг нарийн үзэж, шинжилсэн. Уушгинд нь гарсан өөрчлөлтүүд эргэн сэргэж, сайжирчээ, эмчилгээ зохиж байна гэсэн мэдээг өглөө. Франц иргэн маань “Би инээж байна. Танд ч гэсэн инээд бэлэглэе” гэдэг мессэж бичжээ. Энэ хүнээ бид багадаа арван хоног эмчилж, хянах болно. Энэ байдлаар халдвартай хүмүүсээ эмчилж, сэргээж авна” гэв.
