Гадаад харилцааны сайд Д.Цогтбаатар, ОБЕГ-ын дарга, хошууч генерал Т.Бадрал, дэд дарга, хурандаа Б.Ууганбаяр, “МИАТ” ТӨХК-ийн гүйцэтгэх захирал Д.Баттөр нар цаг үеийн асуудлаар мэдээлэл хийлээ. Энэ үеэр ОБЕГ-ын дарга, хошууч генерал Т.Бадрал “ОХУ-аас 270 гаруй монгол оюутан нутаг буцах хүсэлтээ гаргасан. 90 орчим нь Эрхүүгийнх, 60 орчим хувь нь Улаан-Үдийн оюутнууд бий. Тэднийг татаж авах нь зөв үү гэдэг асуудал яригдаад эхэлчихсэн. Яагаад гэхээр яг энэ цаг үед гадаадад байгаа монголчуудаас маань долоон хүн халдвар авч, тусгаарлагдан эмчилгээ хийлгэж байна. Тэдний хоёр нь Москвад байгаа. Бид оюутнуудаа хүлээж авахгүй тэнд нь байлгаад байвал амь нас нь эрсдэлд орно. Маргааш өглөө 110 хүн Москвагаас Улаан-Үд рүү онгоцоор ирж 09:00 цагт бууна.
Энэ хүмүүсийг авахгүй бол Улаан-Үдэд байгаа оюутнуудтай холилдоод ирнэ. Эрсдэлийг тооцож Москвагийн оюутнуудыг авахаас өөр арга байхгүй. Тиймээс УОК-ын Шуурхай штабаас холбогдох удирдлагууд очиж тэднийг авах ажлыг зохион байгуулж байна. Москва, Эрхүү, Улаан-Үд хотын оюутнуудыг хооронд нь уулзуулахгүйгээр, хавьталд оруулахгүйгээр гурван үе шаттайгаар хүлээж авах ажлыг маргаашнаас эхлэн төлөвлөгөөний дагуу хийнэ” гэлээ.
