АНУ-ын Арлингтон хотод амьдардаг Монгол улсын иргэн Б.Нинжийн гэр бүл дэлхий нийтээрээ коронавирустэй тэмцэж байгаа энэ хүнд цаг үед гар хумхин зүгээр суулгүй эрүүл нийгмийн төлөө сайн дураараа маск оёжээ. Өөрсдийн оёсон маскаа гэрийнхээ ойролцоох эмнэлгийн ажилчдад бэлэглэсэн байна.
Залуу хосууд маань “Энэ нь тийм ч том тусламж биш ч гэлээ олон хүнд туслах сайхан байна. Хүмүүсийн амь насыг аврахын тулд та ч бас тусалж, хандивлаарай” хэмээн уриалсан байна.
Түүгээр ч зогсохгүй “АНУ-д яг одоо нүүрний маск дутагдалтай байна. Энэ нь бие биедээ туслах цаг болсныг илтгэж байна. Ийм хүнд хэцүү цаг үед DC, VA, MD, PA, NY гэх мэт олон нийтийн сүлжээнд ажиллаж байгаа эмч, сувилагч, цагдаагийн алба хаагчид, Uber, Хүргэлтийн жолооч, Касчер, дэлгүүрийн туслах нарт нүүрний маск өгөхийг хүсч байна” гэжээ. Мөн хосууд маань маскнаас гадна нүүрний хаалт хийж хэрэгцээтэй хүмүүст нь өгөхөөр зэхжээ.
