Америкийн Нэгдсэн Улсын Вашингтон ДС хотод ажиллаж амьдарч буй монголчууд цар тахал тархсан энэхүү хүнд хэцүү үед ард олноо хамгаалахын төлөө идэр есийн хүйтнийг ажралгүй зүтгэж буй Тохижилтын үйлчилгээний ажилтнууд, Тээврийн цагдаагийн албан хаагчиддаа халдаг улавчны долоо хоногийн хэрэглээ буюу 1780ш улавч хандивлажээ. 

Хандивын ажлыг санаачилсан тус хотод амьдардаг иргэн Т.Ариунаа, монгол талын ажлыг зохион байгуулсан н.Мядагмаа, Г.Галбадрах болон хандивын аянд оролцож сэтгэл зүрхээрээ нэгдсэн монгол ахан дүүстээ гүн талархал илэрхийлье хэмээн Улаанбаатар хотын менежер Т.Гантөмөр мэдээллээ. 

Тохижилт үйлчилгээний ажилчдад зориулсан 950ш улавчыг Улаанбаатар хотоос гарах замуудын цэвэрлэгээ үйлчилгээг хариуцан ажилладаг Сүхбаатар тохижилт ХХК, Найши трейд ХХК, Улаанбаатар шинэчлэл ХХК, Грэйт роуд ХХК, Охь мандал ХХК-ууд, мөн тэдгээрт өдөр бүр хяналт тавин ажилладаг хяналтын төрийн бус байгууллагууд болох Эмэгтэйчүүдийн эрхи, хамгаалал хөгжлийн хүрээлэн ТББ, Эрүүл мэнд нийгмийн бодлогын хүрээлэн ТББ, Хотын хөгжлийг дэмжих шинэ тосгон холбоо ТББ, Бид туслая ТББ, нохой муур устгалын Өлтэ ХХК, Базалт нэгдэл ХХК, Их булаг АТҮК ХХК компаниудад гардууллаа. Үлдсэн 830ш улавчыг Тээврийн Цагдаагийн албаны ажилчиддаа гардуулан өгнө.

Эх сурвалж: Улаанбаатар хотын Захирагчийн ажлын алба