УИХ-ын 2012 оны сонгуульд Өвөрхангай аймгийн аравдугаар тойрогт МАН-аас нэр дэвшин өрсөлдөж, тойргийн хорооноосоо үнэмлэхээ гардсан С.Чинзориг, Н.Төмөрхүү нар Өвөрхангай аймгийн шүүхэд давж заалдахаар болжээ.
Тэднийг сонгуулийн сурталчилгааны үеэр иргэдэд саналыг нь худалдан авах зорилгоор мөнгө, эд зүйл тарааж хууль зөрчсөн гэж өрсөлдөгч, УИХ-ын гишүүн асан Г.Батхүү, Д.Зоригт нар Хан-Уул дүүргийн  шүүхэд гомдол гаргасан.
Харин үүнийг Нийслэлийн шүүх үндэслэлгүй хэмээн үзсэн ч Г.Батхүү нар Улсын дээд шүүхэд өргөдөл өгөөд байснаа өнгөрсөн пүрэв гаригт татаж авсан юм. Улсын Дээд шүүх асуудлыг хэлэлцэж амжаагүй байхад Өвөрхангай аймгийн шүүх уг асуудлыг хэлэлцэж Г.Батхүү, Д.Зоригт нарын талд шийдвэр гаргасан байна.  Харин  МАН-аас Өвөрхангай аймагт нэр дэвшиж өрсөлдсөн  С.Чинзориг, Н.Төмөрхүү нар энэ шийдвэрийг эсэргүүцэж давж заалдах шатны шүүхэд хандана гэдгээ хэллээ. Тэрээр “Өвөрхангай аймгийн шүүхийн шийдвэр бол анхан шатны шүүхийн шийдвэр. Тиймээс давж заалдах шатны шүүхэд хандана. Тэд биднийг насанд хүрээгүй хүүхэд сонгуулийн сурталчилгаанд ажиллуулсан гэж байгаа. Гэтэл түүнийг  цагдаагийн байгууллага олж тогтоогоогүй. Зөвхөн сонгуулийн тойргийн хорооноос өгсөн бичгийг үндэслэж л ийм шийдвэр гаргасан” гэлээ.