УИХ-ын гишүүн Ц.Цолмонг МҮАН-аас гарч МАХН-д орсон болохоор гишүүний бүрэн эрхийг түдгэлзүүлж эргүүлэн татах боломжтой юу гэж хэвлэл мэдээллээр бичиж байна. Харин энэ талаар өөрөөс нь тодруулсан юм.
-Таныг УИХ-ын гишүүнээс эргүүлэн татах боломжтой гэсэн мэдээлэл гарах боллоо. Яг хуулийнхаа хүрээнд ийм боломж бий юу?
-Сонгуулиас өмнө эвсэл байгуулсан болохоор намууд сонгуулийн субьек бус эвсэлд шилжүүлж байгаа шүү дээ. Тэгэхээр миний энэ хөдөлгөөн эвсэл дотроо байгаа учраас эргүүлэн татах боломжгүй. Энэ бол эвслийн л асуудал. Ямар ч тохиолдолд эвсэл л шийднэ.
-Сүүлийн үед олны анхаарлын төвд байгаа асуудал бол Н.Энхбаяр, М.Энхсайханы харилцаа муудсанаас болж “Шударга ёс” эвсэл задрах нь. Үүнийг мэдэрсэн Ц.Цолмон МАХН-нд элслээ гэж ярьж байна л даа?
-Би хувь хүмүүсийн харилцааг мэдэхгүй. Хоёр хүний харилцаа муудсанаас эвсэл задарна гэж байхгүй байх. МАХН-МҮАН хоёр есөн жилийн хугацаатай улс төрийн холбоо байгуулсан. Шударг ёс эвслийн тухайд сонгуульд зориулж байгуулж хүчээ зузаатгасан хэрэг. Нэг үгээр хэлбэл, дөрвөн жилийн хүчинтэй эвсэл. Тэгэхээр цаашид улс төрийн холбоо байгаа учраас хамтрах нь дамжиггүй байх. Миний хувьд энэ хамтын ажиллагааг нь хурдасгаад нэг улс төрийн хүчин болгоё гэж үзэж байна.
-МҮАН гэхээр М.Энхсайхан, Ц.Цолмон нараар л төсөөлдөг. Хэрэв МҮАН  МАХН руу нэгдвэл хүчтэй нам болно гэж ойлгож болох уу?
-Хүч нь л нэмэгдэнэ гэсэн үг шүү дээ. Тархай бутархай байснаас нэг зохион байгуулалтад орвол үр дагавар нь ч хэрэгтэй. Ер нь, монголд олон нам байхын хэрэггүй гэдэг нь батлагдаж байна шүү дээ.
-МАХН-руу орохдоо та намын даргадаа хэлсэн биз дээ. Ямар байдлаар хүлээж авч байна вэ?
-Хувь хүний л сонголт шүү дээ. Тиймээс бид өөрийнхөө хүслээр л энэ намд орсон. МАХН-д орж байгаагаа Энхсайхан даргад хэлсэн. Жаахан шүүмжлэлтэй л хандаж байна билээ.
-Та нам хооронд нүүдэл хийснээр М.Энхсайхан даргыг ганцаардуулчихаж байгаа юм биш үү?
-Энэ нам чинь хоёрхон хүний асуудал биш шүү дээ. Гэхдээ их талаа барьж хүчээ зузаатгах хэрэгтэй л гэж боддог юм.