Өвөрхангай аймагт нэр дэвшигчдээс Г.Батхүү, Д.Зоригт нарыг УИХ-ын гишүүний тангараг өргүүлэх шийдвэрийг СЕХ өчигдрийн хуралдаанаараа шийдсэн. Харин үүнийг МАН-ын гишүүд эсэргүүцэж хэвлэлийн хурал зарлаж дараа нь Ерөнхийлөгчтэй уулзсан. Үүнийхээ дараа даргын зөвлөлийн хурал руу дайрч орсон юм. Тэгвэл энэ асуудалд АН ямар байр суурьтай байгааг Бүлгийн ахлагч Д.Эрдэнэбатаас  тодруулсан юм.
-МАН-ынхан Г.Батхүү, Д.Зоригт нарыг эсэргүүцэж маргаан үүсгэж эхэллээ. Та үүнийг юу гэж бодож байна вэ?
-Энэ бол хоёр намын асуудал биш шүү дээ. Үүнийг улс төржүүлж болно л доо. Сонгуулийн үйл ажиллагаа явуулж байхад хуулийн зөрчил байсан уу үгүй гэдгийн л асуудал. Хэрэв хуулийн тухай шударга ойлголт байхгүй бол шударга ёс, ардчиллын тухай яриад ч хэрэггүй. Харин хэн хууль зөрчсөн, ямар үйлдэл гаргасан бэ, тэр нь санал хураалтад яаж нөлөөлсөн бэ гэдгийг тогтоосон шүүхийн шийдвэрийг би хамгийн шударга гэж ойлгож байна. Тэр бол шүүхийн асуудал, СЕХ-ны асуудал.
-Шүүх хяналт, хүчний байгууллагыг бүхэлд нь АН мэдэлдээ авчихлаа гэж МАН-ынхан үзэж байна. Магадгүй шүүхийн шийдвэрт нөлөөлсөн байх гэж ярьж байна?
-Тэрийгээ нотол. Нотлоогүй бол бол гүтгэлэг болно. Миний хувьд Өвөрхангай сонгуулийн тойргийн хороонд нөлөөлөөгүй. Би тэднийг ятгаагүй, дарамтлаагүй, тэдэнтэй яриа ч үгүй. Бүх зүйл хуулийн дагуу яваад дуусч байна гэж ойлгож байна. СЕХ сонгуулийн хуулийн зөрчлийн талаар шийдвэр гаргах нь тэдний эрхийн асуудал. Хуулиа зөрччихөөд тэрэндээ улс төрийн тоглолт хийнэ гэдэг бол дэндүү хариуцлагагүй зүйл шүү дээ.