УИХ-ын гишүүн асан Л.Гүндалай УИХ-ын чуулганы үүдийг таглаад сууж байгаа МАН-ынхан дээр очив. Тэрээр, “Бидний байр ингэж солигдох гэж. Тэр тусмаа Нямдорж ингээд сууж байгаа нь сонин байна” гэж хэлсэн юм. Тэрээр ингэж хэлээд тэдэнтэй гар барилаа. Түүнээс МАН-ынхны талаар байр суурийг сонссон юм.
МАН-ын гишүүд, тэр тусмаа Нямдорж хүрч ирээд чуулганы танхимыг хааж, төрийн ордон, төрийн сүлдийг бойкотлоод сууж байгаа нь сонин байна. Яг 10 жилийн өмнө хийж байсан үйлдлийг маань энэ хүмүүс ойлгоогүй байж. 2002 оны намрын чуулганы үеэр би ингэж эсэргүүцэл  илэрхийлж байсан. Түүнийг буруугаар ойлгожээ. Гэхдээ би чуулганы хуралдааныг тасалдуулаагүй. Бусдад саад болоогүй. Би өөрийнхөө байр суурийг чөлөөтэй илэрхийлж байсан. Гэтэл энэ хүмүүс миний ардчиллын төлөө тэмцэж байсныг буруугаар ойлгож байсан өнөөдөр харагдаж байна. Тэгсэн хэрнээ өнөөдөр энэ хүмүүс хаалга тэвхлээд суучихжээ. Энэ бол буруу юм. Ардчилал гэдэг чинь зөв юмыг зөвөөр хийхийг хэлдэг юм. Эсэргүүцэл болгон зөв биш шүү. Үр дагавар нь ямар гарахаас эсэргүүцлийн үр дүн гарна. Эдний ингэж чуулганы үйл ажиллагааг хааж боож байгаа нь үр дүнгээ өгөхөөсөө илүүтэй хор хохирол учруулж байна” гэж УИХ-ын гишүүн асан Л.Гүндалай өөрийн байр сууриа илэрхийлэв.