Монголд багийн спорт хөгжихгүй хэмээх ойлголтыг оролцож буй тэмцээн уралдаан бүртээ няцааж байгаа “ганцхан” спортын төрөл, холбоо  нь Монголын сагсан бөмбөгийн холбоо, тэдгээрийн тамирчид,  дасгалжуулагчид  гээд хэлчихэд нэг их буруудахгүй. Зүүн Азийн аварга, олон улсын тэмцээн уралдаан бүрт яван чангарна гэдгийг бүрэн утгаар нь мэдрүүлж буй тэдний хамгийн ойрын амжилт нь оюутны Азийн аварга шалгаруулах тэмцээн. Азид  сагсан бөмбөгийн спортоор дээгүүрт нэрлэгддэг БНХАУ, Хонконг, Филиппиний шигшээг багийн тоглолтоор байлдан дагуулж,  хүрэл медаль энгэртээ зүүснийг бид сайн мэднэ.
  Их спортоо нэгдүгээрт тавьсан манай улсад  сагсан бөмбөгийн шигшээ болон бусад  багийн спортын  тамирчид бэлтгэл сургуулилтаа базаах заал танхим, тэмцээн уралдаанд оролцох зардал мөнгөнөөс эхлээд л асуудал бэрхшээлтэй тулгардаг. Харин тамирчид, дасгалжуулагчид, Монголын сагсан бөмбөгийн холбоо хэмээх их айл үүнд шантарч няцаж байгаагүй. Тиймдээ ч, нэг тэмцээнд оролцсон бол дараагийн тэмцээн уралдаандаа төвлөрч, бэлтгэл сургуулилтаа чамбайруулдаг тэдний өмнө 2013 оны Зүүн Азийн аварга шалгаруулах тэмцээнээс эхлээд олон улсын томоохон тоглолтууд ар араасаа хөвөрч байна.
  Жил бүрийн арванхоёрдугаар сард болдог дээд лигийн сорил тэмцээн хэдхэн хоногийн өмнө Спортын төв ордонд болж,  аваргууд тодорсон. Тэмцээний аваргаар “Хараагийн харцага”, удаах байрт Монгол Улсын шигшээ багийн туршлагатай дасгалжуулагч О.Баярцогтоор удирдуулсан “Хасын хүлэг” баг шалгарсан бол гуравдугаар байрт “Баянзүрх Бүлзз” багийн залуус орсон юм. Тав  хоногийн турш амжилттай зохион байгуулагдсан тэмцээний хамгийн оргил үе нь Монгол улсын шигшээ багийн тамирчдын нэрсийг, дасгалжуулагчдын хамт зарлах мөч байлаа.
Шигшээ багийн ахлагчаар дээд лигийн ахмад, туршлагатай тоглогчдын нэг О.Сайнбаярыг нэрлэсэн бол багийн бүрэлдэхүүнд Ц.Азбаяр, Т.Ихбаяр, Д.Мөнхболд, О.Сайнбаяр, Т.Баттөр, О.Ууганбаяр, М.Отгонмөнх, А.Энхтүвшин, Д.Дэлгэрням, Ш.Сэдбазар, А.Бямбадорж, О.Сэргэлэн, Д.Цэнгүүнбаяр, О.Доржзовд, С.Өрнүүнбилэг, Ц.Мэргэн, Д.Билгүүн, Ц.Цэрэнбаатар, Д.Одбаяр, М.Бадрах, Н.Золжаргал, А.Од, Б.Батжавхлан нарын 24 тамирчиныг зарласан юм. Харин багийн ахлах дасгалжуулагчаар О.Баярцогт, туслах дасгалжуулагчаар АНУ-аас ирсэн туршлагатай дасгалжуулагч Luke Simons, багийн албаны даргаар дээхэн үеийн лигийн шилдэг холбон тоглогчдын нэг, тус холбооны гүйцэтгэх зөвлөлийн гишүүн П.Ганбат нар сонгогджээ.
 Шигшээ багийн тамирчид  ирэх оны тавдугаар сард БНХАУ-ын Бээжин хотод хамтарсан бэлтгэл хийж, дараа сард нь буюу зургадугаар сард Зүүн Азийн аварга шалгаруулах тэмцээнд оролцох юм. Харин  шигшээ багт сонгогдсон тамирчдаас Зүүн Азийн аварга шалгаруулах тэмцээнээс өмнө дахин сонгон шалгаруулалт хийж 14-15 тоглогчийг сонгож тэмцээнд оролцуулах аж. Тамирчдын бэлтгэл сургуулилт тасралтгүй оролцсон эсэх, тоглолтын ур чадвар зэргээс хамаарч дахин сонгон  шалгаруулалт явуулах юм байна. 
Ер нь, Монголын сагсан бөмбөгийн холбооны удирдлагууд ойрын жилүүдэд гадаад харилцаа тал дээр ихээхэн анхаарч байгаа бөгөөд шинэхэн байгуулагдсан шигшээ багийн залуусыг ирэх оны наймдугаар сард АНУ-д бэлтгэл хийлгэхээр болсон таатай мэдээг ч дуулгасан юм. Аль, аль талдаа спортыг тэр дундаа багийн спортыг хөгжүүлэх гээд хичээж байгаа баг тамирчдаа дэмжих цаг нь болжээ. Шинэхэн байгуулагдсан Соёл, спорт, аялал жуулчлалын яам,  Спорт бэлтгэлийн төвийнхөн энэ тал дээр анхаарлаа хандуулна гэдэгт итгэж байна.
  Багийн... Сагсан бөмбөгийн спортоо дэмжицгээе.