Өмнөд Солонгосын Севол усан онгоц живж, олон арван хүний эрдэнэт амь үрэгдсэн эмгэнэлт явдлаас сэргийлж чадаагүйдээ тус улсын Ерөнхийлөгч Пак Кын Хе уучлал гуйлаа. Тэрээр Ансан дахь амь үрэгдэгсдийн дурсгалыг хүндэтгэх газар ирж эмгэнэл илэрхийлсний дараа Засгийн газрын гишүүдийн өмнө мэдэгдэл хийхдээ,  хохирогчдын ар гэрийнхнээс, ард түмнээсээ уучлал гуйжээ. "Олон хүний эрдэнэт амь үрэгдэхээс сэргийлж чадаагүй, анхны түргэн тусламжийг хангалттай үзүүлж чадаагүйдээ зүрх хөндүүрлэн харамсч, хэрхэн уучлал гуйхаа ч мэдэхгүй байна" гэж мэдэгджээ.
Онгоцны зорчигчдыг аврах ажиллагааг хангалттай явуулж чадаагүй хэмээн улс орон даяар эрх баригчдаа шүүмжилж байгаа энэ үед  Ерөнхийлөгч ийн уучлал гуйлаа. Цаашид ийм эмгэнэлт явдал гаргахгүйн тулд Засгийн газрын харьяа томоохон гамшиг осол гарсан үед хариуцан ажиллах агентлаг байгуулсан байна.