ОХУ-ын Өвөрбайгалийн Карымын районд зэвсэг, байлдааны хэрэгслийн агуулах дэлбэрсний улмаас 10 хүн амь үрэгдээд байна гэж тус хязгаарын албан ёсны сайтад өнөөдөр өглөө мэдээлжээ.

“Одоо мэдэгдэж байгаагаар 10 хүн амь үрэгдсэний дөрвийн нь цогцосыг гаргаж авсан бол зургаа нь аюултай бүсэд байна. Өөр бас 11 хүн бэртэж шархадсаны дөрөв нь хүнд байна. Энэ хүмүүсийгр эмнэлэгт хүргэж хөнгөн, хөнгөвтөр шархадсаныг эмнэлгийн тусламж үзүүлээд гэрт нь явуулсан” гэж мэдээлэлд дурджээ.
Үүний өмнө Батлан хамгаалах яам амь үрэгдсэн хүн байхгүй, зургаан хүн л сураггүй алга болсон байна гэж мэдэгдэж байсан юм.
Орон нутгийн эрх баригчдын мэдээлснээр бол 20 ч удаа дэлбэрлэлт болжээ. Агуулахад тротил, танк болон явган цэрэг эсэргүүцэх мина, тэсрэх бодис хадгалж байжээ.
Дэлбэрэлтийн улмаас ойрын тосгонд орон сууцны байшингууд хэсэгчлэн эвдэрч, сургуулийн шил цонх хагарсан байна. Одоо тосгоны орчмын авто зам, өвөр байгалийн төмөр замын хөдөлгөөнийг хааж, ослын газарт БХЯ, Холбооны аюулгүйн алба, дотоодын цэргийн 459 хүн, 191 нэгж техник ажиллаж байгаа юм байна. Ойролцоох гурван тосгоноос 280 хүн, үүний дотор 83 хүүхдийг нүүлгэн шилжүүлсэн байна.